Սյունիքի նախկին մարզպետը դատի է տալիս ՀԿ-ին և լրատվամիջոցներին
Մերձավոր ԱրևելքՍյունիքի նախկին մարզպետ Վահե Հակոբյանը դատի է տվել ՀԿ-ին և մի քանի լրատվամիջոցների։ ԼՈւՐԵՐ․com-ը «Դատալեքս» դատական տեղեկատվական համակարգից տեղեկանում է, որ նախկին մարզպետը «Իրազեկ քաղաքացիների միավորում» խորհրդատվական ՀԿ-ից, «Սյունյաց աշխարհ» և «ԱՐՄԴԵՅԷՅԵՄ» լրատվականներից պահանջում է պատվին և արժանապատվությանը հասցված վնասի հատուցում և հերքում, Fip.am-ից 2 մլն դրամի փոխհատուցում և նախապես վճարված պետական տուրքի 44 000 դրամ, իսկ Դանիել Իոհաննիսյանից՝ պատվին և արժանապատվությանը պատճառված վնասի հատուցում, ներողություն խնդրելու պարտավորություն և1 մլն դրամի փոխհատուցում։
«Իրազեկ քաղաքացիների միավորման» փաստերի ստուգման հարթակը՝ Fip.am-ը հրապարակել էր, որ «Վահե Հակոբյանը հիմնադրամների միջոցով ֆինանսավորել է իր և կնոջ բիզնեսները» վերտառությամբ հոդվածը, որտեղ ասվում է, որ Հակոբյանը ստեղծել է Սյունիքի զարգացման և ներդրման հիմնադրամը, որի միջոցները գոյացել են Զանգեզուրի պղնձամոլիբդենային կոմբինատի նվիրատվություններից։
Երևան քաղաքի ընդհանուր իրավասության առաջին ատյանի դատարանի դատավոր Արմենուհի Բադիրյանը մարտի 15-ին հայցը հետ է վերադարձրել Վահե Հակոբյանին՝ նշվելով, որ հայցադիմումին կցված չեն պետական տուրքի վճարումը հավաստող ապացույցը, լրատվական միջոցների հրապարակումների արտատպված պատճենները։ Հակոբյանին տրվել է 3 օր՝ թերությունները վերացնելու և այն կրկին դատարան ներկայացնելու համար։
Նշենք նաև, որ նախկին մարզպետը Դանիել Իոաննիսյանից պահանջել է 1 միլիոն դրամի փոխհատուցում ֆեյբուքում կատարած գրառման համար։ Խոսքը փետրվարի 5-ին «Սյունյաց երկիր» թերթի գլխավոր խմբագրի մեքենայի հրկիզումից հետո արված գրառման մասին է, որտեղ հիշատակվում էր Վահե Հակոբյանի անունը։