Այս անգամ չստացվեց. քանի՞ խաղաքարտ է մնում Փաշինյանին ձեռքին
ՎերլուծականԵրեկ Վիեննայի «Բրիստոլ» հյուրանոցում տեղի ունեցավ Հայաստանի վարչապետ Նիկոլ Փաշինյանի ու Ադրբեջանի նախագահ Իլհամ Ալիևի առաջին պաշտոնական հանդիպումը: Հանդիպման ավարտից հետո ինքը՝ Փաշինյանը հայտարարել է, որ հանդիպումը անցել է կառուցողական մթնոլորտում և նորմալ: Ուշագրավ է սակայն, որ թե՛ Փաշինյանի, թե՛ Ալիևի և թե՛ համանախագահների տարածած հայտարարության մեջ խոսք անգամ չկար այն մասին, որ հանդիպման ընթացքում շոշափվել են Արցախը բանակցությունների սեղանի շուրջ վերադարձնելու, ասել է թե՝ բանակցային ֆորմատը վերաձևափոխելու հնարավորությունները: Նման հայտարարության բացակայությունն ինքնին՝ արդեն իսկ խոսուն փաստ է: Փաշինյանին այդպես էլ չի հաջողվել հասնել իր նախանշած նպատակին, և ըստ էության, բանակցությունները շարունակվելու են Հայաստանի և Ադրբեջանի միջև: Մի կողմից՝ սա նշանակում է Փաշինյանի բանակցային ռազմավարության տապալում, մյուս կողմից՝ հենց Փաշինյանի թիմակիցներն են փաստել, որ բանակցությունների այլընտրանքը կատաստրոֆան է:
Համանախագահների հայտարարության միակ նորությունը վերաբերվում է մարդասիրական միջոցառումներին, որոնք պետք է իրականացնեն երկու կողմերը: Նախկինում, օրինակ, հստակ առաջարկվում էր սահմանից հետ քաշել դիպուկահարներին, հետաքրքիր է, կա՞ արդյոք նման առաջարկ այսօր օրակարգում, թե՞ կողմերը սկսում են ինչպես ասում են՝ մաքուր էջից: Ինչ վերաբերում է մարդասիրական միջոցառումներին, ապա այնքան էլ հասկանալի չէ թե ինչ նկատի ունեն համանախագահները: Օրինակ, նման միջոցառումների տակ կարելի է ենթադրել գերիների փոխանակումը, իսկ գուցե Բաքուն ի վերջո արձագանքի՞ Աննա Հակոնյանի «Կանայք հանուն խաղաղության» նախաձեռնությանը: Այս քայլերը, իհարկե, կարող են հանգեցնել լարվածության որոշակի թոթափմանը, սակայն վերջնական արդյունքը ապահովվելու է այն սկզբունքների համադրմամբ, որոնց շուրջ կողմերն այսօր տրամագծորեն հակառակ պատկերացումներ ունեն:
Ի դեպ, ուշագրավ է, որ երեկվա հանդիպումից հետո, ՀՀ Պաշտպանության նախարար Դավիթ Տոնոյանը Նյու Յորքում հայ համայնքի հետ հանդիպման ժամանակ հայտարարել է, որ «Տարածքներ խաղաղության դիմաց» ձևաչափ այլևս չի լինելու: Նա նշել է, որ մենք հակառակն ենք անում՝ նոր պատերազմ՝ նոր տարածքների դիմաց: Նրա խոսքով՝ ոչ մի բան չի զիջվելու: Հնարավոր են կոմպրոմիսներ, բայց ոչ զիջումներ: Թերևս հասկանալի է, թե երեկվա բանակցություններում ինչպիսի պահանջներ և սկզբունքներ է առաջ քաշել ադրբեջանական կողմը: Սա հայկական կողմի համարժեք պատասխանն է և բնավ էլ պատահական չէ, որ այդ պատասխանը հնչում է Նյու Յորքից…