Մանվել Գրիգորյանի ղեկավարման ժամանակ երկրապահը իշխանության կցորդը չի եղել․ Արամ Սարգսյան
ՀասարակությունԱյսօր՝ ապրիլի 7-ին, տեղի ունեցավ ԵԿՄ 12-րդ համագումարը, որի ընթացքում միության անդամները պետք է ընտրեին վարչության կազմ և ԵԿՄ նախագահ։ Պաշտոնի միակ թեկնածուն Սասուն Միքայելյանն էր։
Նախկինում թեկնածություն էր առաջադրել նաև Արամ Զ. Սարգսյանը, սակայն որոշ ժամանակ առաջ հետ էր վերցրել իր առաջադրումը։ Այս թեմայի շուրջ լրագրողների հետ զրույցում Արամ Զ. Սարգսյանն ասաց, որ հարցը վաղուց դուրս է օրակարգից։ Մանվել Գրիգորյանին կալանավորելուց հետո, այդ թեման քննարկվեց, մեկնաբանվեց, բայց ինքն հայտարարել է, որ այդ խնդրում իմ անելիքը համարում է ավարտված և տեսնում է, որ Երկրապահի նախագահը պետք է ներսից լինի.
«Ես չեմ կիսում այն մոտեցումը, որ Մանվել Գրիգորյանի ղեկավարման ժամանակ երկրապահը իշխանության կցորդն է եղել։ 1994 թվականին, երբ բանակ չկար ժողովրդի հույսը Երկրապահն էր։ Ժողովրդի հույսը վերջում միշտ մնում է Երկրապահի վրա։ Երկրապահը չի կարող իրականությունից դուրս մնալ։ Շատ օրինակներ կան, անգամ Մարտի 1-ին Երկրապահը իշխանության կցորդը չի եղել, երբեք էլ չի եղել ու չի լինելու։ Ուղղակի թե՛ իշխանությունը, թե՛ ընդդիմությունը Երկրապահը՝ ծնունդի քաղցր տորթի նման դեպի իրենց են քաշել, ամեն մեկն իր բաժինը կտրի, տանի, իսկ երբ չի ստացվել՝ տրորել ու փչացրել են։ Մանվել Գրիգորյանի դեպքում խնդիրը հետևյալն է՝ օրենքի առաջ հավասար են բոլորը։ Եթե կա օրենքի խախտում, ապա դատարանը կորոշի, կստուգի, կպատժի։ Խնդրին պետք է այս տեսանկյունից նայել, չպետք է կապել Երկրապահի հետ։ Անհատով չէ, սա շատ լուրջ կառույց է»,- իր խոսքում նշեց Արամ Սարգսյանը ։
Անդրադառնալով Հոկտեմբերի 27-ի բացահայտման գործընթացի վերաբացմանը, Սպարապետի եղբայրն ասաց՝
«Ես բազմաթիվ անգամներ ասել եմ, որ բոլոր վարկածները ստուգելու, վերջնական արդյունքի հասնելու, պարփակելու հնարավորություն կարող է ունենալ այն պետությունը, որը ամուր կանգնած է իր ոտքերի վրա, որի քաղաքական, տնտեսական, ռազմական անկախությունը՝ գոնե 60 տոկոսից ավելին է։ Ես հույս ունեմ, որ մեր պետությունը առաջիկայում այդպես կդառնա։ Եթե հիմա վերաբացելու ենք գործը ու գնալու ենք մինչև Մոսկվա, մինչև Լիտվինենկոյի վարկած ու այնտեղ դռները փակելու ենք, ասելու ենք՝ մենք ՀԱՊԿ-ում ենք, Եվրասիական միությունում ենք, ապա եկեք ուրիշ բան մտածենք կամ ուրիշի վրա գցենք։ Ուրիշ օտարերկրյա խանգարող հանգամանքներ գտնենք, ավելի լավ է հիմա չվերաբացենք»։
Հիշեցնենք, որ բաց քվեարկության արդյունքում ընտրվեց 25 հոգանոց վարչության կազմ, որն էլ իր հերթին ԵԿՄ նախագահի պաշտոնում ընտրեց Սասուն Միքայելյանին։
Ասպրամ Փարսադանյան