Ոչ մեկը թող չնյարդայնանա, բոլորի պատասխանատվության պահը կգա․ Նիկոլ Փաշինյան
Քաղաքական«Ես հանդիպումից ակնկալում եմ, որ էն հանձնարարականը, որ մենք տվել ենք արտաքին գործերի նախարարներին Ադրբեջանի նախագահի հետ, էդ հանձնարարականը կկատարվի, իսկ էդ հանձնարարականը Վիեննայում մեր քննարկած հարցերի շրջանակը, մեր օրակարգերի շուրջ քննարկումներ ունենալն է և դիրքորոշումները մոտեցնել փորձելը»,-այս մասին այսօր լրագրողներին ասաց Նիկոլ Փաշինյանը՝ խոսելով այսօր ՀՀ և Ադրբեջանի արտաքին գործերի նախարարների հանդիպման մասին։ Հարցին, թե ինչո՞վ է պայմանավորված, որ մասնակցում է նաև ՌԴ արտգործնախարարը, Փաշինյանը նշեց, որ ոչ մի տարօրինակ բան չկա․ ՌԴ-ն ԵԱՀԿ Մինսկի խմբի համանախագահող երկրներից է, էդպիսի պրակտիկա եղել է և կլինի։
Անդրադառնալով այսօրվա #sutinikol ֆլեշմոբին, լրագրողները հարց ուղղեցին, նշելով, որ վարչապետին մեղադրել են, որ իր տված խոստումներին տեր չի կանգնում, վարչապետը ճշտող հարց ուղղեց, թե ո՞ր խոստումներին, լրագրողները նշեցին, մասնավորապես, Սաշիկ Սարգսյանի միլիոնների հետ կապված հարցը, ինչին Փաշինյանը պատասխանեց․
«Ես ուզում եմ հասկանամ՝ ավարտվել ա՞ ինչ-որ բան, հա՞, նկատի ունեմ հիմա մենք վավերագրական ֆիլմի մեջ ենք, որտեղ արդեն գրվել ա ֆիլմի վերջը և էկրանը մգացել ա՞։ Որ ասում են՝ չի բացահայտվել, ի՞նչը չի բացահայտվում, քրգործ ա հարուցված, մեղադրանք ա առաջադրված, և քննչական մարմինը, քննիչը հնարավորություն ա տվել, որպեսզի մեղադրյալը հանրապետությունից դուրս գա՝ ինչ-ինչ նկատառումներով։ Էդ որոշումը ես չեմ կայացրել և եթե պարզվի, որ էդ որոշումը սխալ ա՝ դատավարական առումով՝ էդ թույլտվությունը տված անձինք խստագույն պատժի կենթարկվեն»,-ասաց Փաշինյանն ու հիշեցրեց, որ իրենց խնդիրը մարդկանց քառատելը չի։
«Ինչքան հասկացա՝ էդ ակցիայի կազմակերպիչները Սաշիկ Սարգսյանի կողմնակիցներն են, ասենք, հիմա Սերժ Սարգսյանի որոշ կողմնակիցներ մեզ մեղադրում են, որ Սերժ Սարգսյանին չենք ձերբակալել, Սաշիկ Սարգսյանի կողմնակիցները մեղադրում են, որ էս չենք արել, էն չենք արել։ Խորհուրդ եմ տալիս՝ ոչ մեկը թող չնյարդայնանա, բոլորի պատասխանատվության պահը կգա. նրանք, ովքեր պատասխանատվության ենթակա արարք են թույլ տվել, պատասխանատվության կենթարկվեն»,-ասաց Փաշինյանն ու ավելացրեց, թե ցանցերը բռնած՝ փողոցներով չեն վազելու՝ մարդ բռնեն։