Կգտնվեն մարդիկ, ովքեր կկանգնեն Սերժ Սարգսյանի կողքին․ իմքայլական պատգամավոր
Քաղաքական«Սերժ Սարգսյանը խոսելու թեմաներ, անշուշտ, ունի: Իհարկե, դրանց առաջնահերթությունն ինքը պետք է որոշի, բայց որ ժամանակը կգա և ինքը կխոսի, կարծում եմ, տրամաբանական է: Լևոն Տեր -Պետրոսյանն էլ երկար ժամանակ չէր խոսում, Ռոբերտ Քոչարյանն էլ, և դա բնական պրոցես է: Հատկապես Սերժ Սարգսյանի դեպքում դա բնական է, որովհետև նա քաղաքական ասպարեզից դուրս եկավ շատ դրամատիկ և հետաքրքիր քաղաքական պրոցեսների հետևանքով»,- ԼՈւՐԵՐ.com-ի հետ զրույցում հայտարարեց «Իմ քայլը» խմբակցության պատգամավոր Գայանե Աբրահամյանը` անդրադառնալով ՀՀԿ փոխնախագահ Արմեն Աշոտյանի հայտարարությանը, թե Սերժ Սարգսյանը կխոսի կոնկրետ պահի և շուտով:
Անդրադառնալով Սերժ Սարգսյանի ունեցած լսարանին՝ պատգամավորը նշեց, որ բոլորին է հետաքրքիր լինելու նրա ասելիքը. «Բոլորիս է հետաքրքիր, թե այդքան ժամանակ անց որն է լինելու Սերժ Սարգսյանի ասելիքը, բայց ամեն դեպքում կարծում եմ, որ ինքն ունի իր այն մոտավոր 4.5% լսարանը, որոնք ՀՀԿ-ին ձայն էին տվել»,-ասաց Գայանե Աբրահամյանը:
Հարցին, թե արդյոք այս ընթացքում Սերժ Սարգսյանն ունի արդեն քննադատություններ ներկայացնելու առիթ, պատգամավորն արձագանքեց. «Ցանկացած կառավարող ուժ, միշտ ունի քննադատության որոշակի առիթներ: Եթե ցանկացած առիթ օգտագործվում է` հատկապես մոնիպուլատիվ, ապա ցանկացած քննադատության առիթ կարող է լինել, քանի որ ոչ մի երկրում կառավարող ուժն իդեալական չէ: Միշտ հնարավոր է քննադատել` կախված նրանից, թե այդ քննադատությունը որքանով է հիմնավոր: Նաև կախված է նրանից, թե ով է քննադատությունը տվողը: Ես վստահ չեմ, որ Սերժ Սարգսյանը որևէ կերպ լեգիտիմ իրավունք ունի այս իշխանությանը քննադատելու, որովհետև իրենց սխալներն այնքան շատ են եղել և հատկապես համակարգային սխալները: Իրենց սխալները չեն եղել անփորձության հետևանքով կամ սայթաքումներ, հստակ մարտավարություն է եղել` երկիրը տանել կործանման»,- ասաց Գայանե Աբրահամյանը։
Թե արդյոք կգտնվեն մարդիկ, ովքեր Նիկոլ Փաշինյանի մեկ տարվա գործունեությունից հետո, այնուամենայնիվ, կկանգնեն Սերժ Սարգսյանի կողքին, պատգամավորը չժխտեց.«Իհարկե, կգտնվեն մարդիկ, ովքեր կկանգնեն Սերժ Սարգսյանի կողքին, որովհետև այս հասարակության մեջ շատ են մարդիկ, ովքեր ավելի շատ կգերադասեին ապրել ոչ ժողովրդավար և կոռումպացված համակարգում: Այդ համակարգում, շատ մարդկանց համար գործողություններ, բիզնես և այլն իրականցնելը շատ ավելի հեշտ էր: Ժողովրդավարությունը մի դժվար ճանապարհ է, որը հանրային բարիք է ստեղծում, իսկ հանրային բարիքը 5% կամ 10% անձանց մոտ որևէ կերպ առաջնային չի կարող լինել»,-եզրափակեց Գայանե Աբրահամյանը:
Սիլվի ՏԻԳՐԱՆՅԱՆ