Ընդունեցին Քաղաքացու օր, բայց չգիտեն` ինչպես են նշելու
ՔաղաքականԱյս տարի՝ ապրիլի 27-ին, կնշվի Հայաստանի Քաղաքացու օրը։ Այն ավելի հիշարժան դարձնելու համար կառավարությունը մշակել է միջոցառումների ծրագիր։ ԼՈՒՐԵՐ.com-ը փորձեց պարզել, թե ինչպես են այդ օրը անցկացնելու իմքայլական պատգամավորիներից մի քանիսը։
Հայկ Կոնջորյան
«Կառավարությունը միջոցառումների ծրագիր ունի, որը շուտով կհրապարակվի։ Իհարկե, այդ միջոցառումներում ներգրավված է նաև Ազգային ժողովը։ Դեռ հստակ չեմ որոշել, թե ինչ ձևով եմ նշելու, առաջիկայում պարզ կլինի։ Առանձին էլ կնշեմ, իհարկե, բայց, բնականաբար, որպես ԱԺ պատգամավոր, պետք է հասկանալ, թե ի՞նչ ֆորմատով, ո՞րտեղ պետք է մասնակցություն ունենա Ազգային ժողովը, ի՞նչ մասնակցություն պետք է ունենա։ Բնականաբար, և´ այդ իմաստով, և´ անձնական իմաստով, որևէ կերպ կնշեմ, այս պահին դեռ հստակ չէ»։
Տաթևիկ Հայրապետյան
«Իրականում, քանի որ օրվա հետ կապված բավանին հիշողություններ կան, բացի առկա ծրագրից, ժամանակ ունենալու դեպքում օրը կնշեմ ընկերներիս հետ։ Այն մարդկանց հետ, ում հետ տոնել եմ այդ օրը մեկ տարի առաջ։ Ուղղակի կհավաքվենք, կհիշենք անցած օրերը և լավ ժամանակ կանցկացնենք»։
Գայանե Աբրահամյան
«Ես անհատական որոշում ունեմ, բայց առաջին հերթին պետք է հստակեցնել, թե ընդհանուր ինչպես ենք նշելու և որքանով կարող եմ անհատական որոշումս իրականացնել։ Քաղաքացու օրն ինձ համար, նախ և առաջ, քաղաքացու պատասխանատվությունն է։ Անցած տարի այդ օրը՝ ապրիլի 24-ին, ես նախաձեռնել էի քաղաքը մաքրելու իրական և խորհրդանշական ակցիա։ Այս տարի կուզենամ, որ քաղաքի և երկրի նկատմամբ պատասխանատվության դրսևորման նմանանատիպ ակցիա իրականցնենք։ Բայց սա կախված է նաև ընդհանուր ծրագրից․ եթե հնարավորություն ունենամ այդ ակցիան իրականցնելու, ապա դրա մասին կիմանան բոլորը, քանի որ հայտարարության միջոցով կհանրայնացվի»։
«Իմ քայլը» խմբակցության պատգամավորներից մի քանիսը դեռ չեն որոշել՝ ինչպես են անցկացնելու այդ օրը․ նրանք սպասում են կառավարության միջոցառումների ծրագրին։
Ասպրամ Փարսադանյան