«Կամազի» հանդեպ «սիրո» կոռուպցիոն երանգները
ՎերլուծականԱրդեն մեկ շաբաթից ավելի է՝ Երևան քաղաքի ոչ մի վարչական շրջանում պատշաճ աղբահանություն չի իրականացվում։ Քաղաքի տարբեր հատվածներում տեղադրված աղբամանները լցված են, հարակից տարածքները նույնպես պատված են աղբակույտերով։ Մարդիկ համացանցում տեղադրում են իրենց վարչական շրջանում արված աղբակույտերի լուսանկարները և պահանջում այն մաքրել, բայց ոչ մի արձագանք։ Հայկ Մարությանի այն հայտարարությունը, թե տվյալ խնդրում գլխավոր մեղավորը նախկին իշխանություններն ու «Սանիթեք»-ն են, խոսում է նրա անպատասխանատվության մասին, քանի որ դառնալով Երևանի քաղաքապետ՝ նա պատշաճ քայլեր չի ձեռնարկել, կամ ձեռնարկված քայլերը բավարար չեն եղել խնդրին լուծում տալու համար: Դա էլ դեռ բավարար չէր, ըստ ամենայնի, վերոնշյալ խնդիրը լուծելիս քաղաքապետարանը որոշել է դիմել ինչ-ինչ մախինացիաների:
Կառավարության շենքի մոտ այսօր հայտարարությամբ հանդես եկան Երևանի ավագանու «Լույս» խմբակցության անդամները: Կառավարությունն այսօրվա նիստում քննարկեց և հաստատեց մեկ անձից գնման ընթացակարգով Երևան համայնքին աղբատար մեքենաների ձեռքբերումը կազմակերպելու հնարավորություն տալու հարցը: Քաղաքապետարանը պատրաստվում է մեկ անձից խոշոր գնում կատարել, այն էլ՝ 900 միլիոն դրամի։ Ավագանու անդամն ասաց, որ քաղաքապետարանն այնպիսի չափանիշեր է սահմանել, որին համապատասխանում է գնման մեկ մասնակից միայն: Ուշագրավ է այն հանգամանքը, որ իսկապես՝ քաղաքապետարանը, որպես տեխնիկական բնութագիր, 24 աղբատար մեքենաների համար նշել է Euro 3 բնապահպանական ստանդարտը: Անգամ եթե հայտարարվեր մրցույթ՝ այդ չափանիշին համապատասխանելու էր միայն «Կամազը»
Հունվար ամսին, երբ քաղաքապետարանը ձեռք էր բերել առաջին 9 «Կամազը», վճարելով շուրջ 414 միլիոն դրամ, քաղաքապետարանից պարզաբանեցին, որ հրատապության սկզբունքից ելնելով՝ ընտրվել է մրցույթի՝ օրենսդրորեն ամրագրված մեկ անձից գնում կատարելու տեսակը։ Բաց, հանրային կերպով մրցույթի տվյալները դրված են եղել համացանցում, ինչը նշանակում է, որ կարող էր ցանկացած ընկերություն այդ ընթացակարգով դիմել և մասնակցել այդ գնման գործընթացին: Սակայն ինչպե՞ս այդ ընկերությունները պետք է մասնակցեին գնման գործընթացին, եթե ինչպես արդեն նշել ենք՝ ընտրված չափանիշներին համապատասխանում էր միայն «Կամազը»: Ո՞րն էր այդ դեպքում նրանց մասնակցելու իմաստը:
Քանի դեռ չկան պաշտոնական բացատրություններ, ապացույցներ որ Խաժակյանի բերած փաստերը չեն համապատասխանում իրականությանը՝ հիմնավոր կասկածներ են պահպանվում, որ Երևանի քաղաքապետարանում կոռուպցիոն սխեմաները շարունակում են գոյություն ունենալ և աշխատել: Եթե պարզվի, որ այս ամենը համապատասխանում է իրականությանը և գնման գործընթացում տեղի են ունեցել նման կարգի խախտումներ, ապա անշուշտ, աղբահանության թեման կմղվի երկրորդ պլան, իսկ առաջին պլան կգա քաղաքապետ Հայկ Մարությանի անհապաղ հրաժարականի հարցը: Հրաժարական, որը կարծես թե վաղուց է հասունանում, այն պարզ պատճառով, որ Մարությանը պաշտոնավարման ամիսների ընթացքում տապալել է գրեթե ամենն, ինչ հնարավոր է տապալել և այս պահի դրությամբ միանշանակ է, որ նա չի արդարացնում երևանցիների՝ իր օգտին տված քվեները: