«Քաղաքացու օրվա» համար 124 միլիոն դրամը աբսուրդային մեծ գումար չէ. իմքայլական պատգամավոր
ՔաղաքականԼՈՒՐԵՐ.com-ի հետ զրույցում ԱԺ «Իմ քայլը» խմբակցության պատգամավոր Հայկ Գևորգյանը կարծիք հայտնեց, որ «Քաղաքացու օրը» տոնելու համար տրամադրված 124 միլիոն դրամը աբսուրդային մեծ գումար չէ:
«Աբսուրդային մեծ գումարների մասին ես ամբիոնից եմ խոսել: Նախկինում, միլիարդավոր գումարներ են կորել և անհայտ է, թե ինչ են եղել դրանք: Ես կուզենայի, որ ավելի շատ դա քննարկեն, ոչ թե այն, որ Կառավարությունը 124 միլիոն տալիս է և այն ծախսվելու է թափանցիկ: Այս գումարը, այն մութ կորած գումարների շատ չնչին տոկոսն է»-նկատեց Հայկ Գևորգյանը` նշելով, որ եթե չվստահեր Կառավարությանը, ապա չէր լինի տվյալ քաղաքական ուժի ներկայացուցիչ` չլինելով կուսակցության անդամ:
Պատգամավորը նկատում է նաև, եթե այդ գումարը չտրամադրվեր, ապա կլինեին նաև դժգոհողներ, թե ինչու տոնը կա, բայց գումարը չկա:
Նրա խոսքով` արժևորելով «Քաղաքացու օրը» պետք է ապրել այնպիսի սկզբունքներով, որ բյուջեն դառնա շատ ավելի հարուստ, որպեսզի շատ արագ լուծվեն քաղաքացիների կյանքում առկա խնդիրները:
«Ես, իհարկե, ծանոթ չեմ Կառավարության այդ օրվա ծրագրին, բայց վստահում եմ գումարի չափը որոշողներին, վստահում եմ, որ գումարն անիմաստ չի ծախսվելու: Որպես տնտեսագետ պատգամավոր կարող եմ ասել, այնպես է, որ այդ գումարը որևէ մեկը չի դնում գրպանը և մեկնում օրինակ` Ճապոնիա, այդ գումարը նորից վերադառնում է բյուջե` որևէ գույք գնելով կամ որևէ միջոցառում կազմակերպելով: Ծախսվող գումարը մտնում է շրջանառության մեջ և հարկերի ձևով դրա մեծ մասը վերադառնում պետական բյուջե»- ասաց Հայկ Գևորգյանը: