Թալանված փողերը ե՞րբ կվերադառնան Հայաստան. 6,2 միլիարդը մոռացվե՞լ է
ՎերլուծականԹավշյա հեղափոխությունից հետո շատերը հույս ունեն, որ նոր իշխանությունները հետ կբերեն նախկինների թալանած և նրանց կողմից արտերկիր տեղափոխված հսկայական գումարները։ Ավելին, կառավարությունն էլ հայտարարել է, որ այդ ուղղությամբ ինտենսիվ աշխատում է։ ՀՀ առաջին փոխվարչապետ Արարատ Միրզոյանը դեռևս նախորդ տարվա օգոստոսին հայտարարել էր, որ երկրից թալանված և արտերկրում հանգրվանած ունեցվածքի նույնականացման և վերադարձի գործընթաց սկսելու ակնկալիքով խորհրդատվական և տեխնիկական աջակցություն ստանալու վերաբերյալ նամակ է գրել Համաշխարհային բանկի ղեկավարությանը: Թե այդ նամակին ինչ պատասխան է ստացվել և ստացվե՞լ է արդյոք, թե ոչ՝ չգիտենք:
Գոյություն ունի Համաշխարհային բանկի և ՄԱԿ-ի ձևավորած STAR գործիքը, որի միջոցով հնարավոր է երկրորդ երկրի իրավապահների օգնությամբ հայտնաբերել ապօրինի ճանապարհով գումարներ դուրս բերած ընկերություններն ու մի քանի ընթացակարգերի (այդ թվում դատական գործընթացի) միջոցով վերադարձնել այդ գումարները։ Համաձայն STAR-ի տվյալների, վերջին 21 տարում այս գործիքի միջոցով Ֆիլիպինների իշխանություններին հաջողվել է վերադարձնել շուրջ 1 միլիարդ դոլար: 2007 թվականին Պերուի իշխանություններն էլ օֆշորային գոտիներից վերադարձրել են 174 մլն դոլար: Նիգերիան 700 մլն դոլար է վերադարձրել շվեյցարական բանկերից: Իսկ մեր իշխանությունները դեռևս սայլը առաջ չեն կարողանում շարժել, չնայած այս դեպքում էլ հարց է՝ չեն ուզո՞ւմ, թե՞ չեն ցանկանում:
Գաղտնիք չէ, որ ապօրինի հարստացած անձինք իրենց ունեցած գումարները գերադասում են պահել օֆշորային գոտիներում (այդ թվում շվեյցարական բանկերում): Ու եթե իշխանություններն իսկապես ցանկանում են կոռուպցիայի, ապօրինի հարստացման դեմ պայքարի շրջանակներում ՀՀ-ից ապօրինի ճանապարհով դուրս բերված գումարները վերադարձնել, ապա առաջին քայլով պետք է համագործակցեն օֆշորային երկրների իրավապահ համակարգի հետ՝ ինչը մեր իշխանությունները դեռևս չեն արել: Նրանք կարծես թե նույնիսկ մոռացել են, որ նման խոստում էին տվել: Գուցե պատճառն այն է, որ հասկացել են՝ խոստումը կատարելը այնքան էլ հեշտ չի լինելու, հաշվի առնելով օբյեկտիվ և սուբյեկտիվ իրողությունները: Չի բացառվում նաև, որ իշխանություններն ի սկզբանե չէին էլ ցանկացել սկսել նման գործընթաց և ապօրինի դուրս բերված գումարների վերադարձի խոստումը ընդամենը պոպուլիզմի հերթական դրսևորումն էր…