Ռոբերտ Քոչարյանը դժգոհություններ չի հայտնել. ՄԻՊ
Իրավունք«Պաշտոնյաները, հատկապես՝ հանցավորության դեմ պայքարի ոլորտի պատասխանատուները, պետք է զգույշ լինեն իրենց հայտարարություններում, այլապես դա կվնասի գործին: Խնդիրը հիմա էլ է առկա, ուստի բոլորին կոչ կանեմ պահպանել անմեղության կանխավարկածի սկզբունքը»,-այս մասին Ազգային ժողովում լրագրողների հետ զրույցում հայտարարեց ՄԻՊ Արման Թաթոյանը:
Նա նշեց, որ Մարտի 1-ի հայտնի քրեական գործով ՀՀ սահմանադրական կարգի տապալման համար մեղադրվող Ռոբերտ Քոչարյանի անմեղության կանխավարկածի պահպանման առնչությամբ ՀՀ Մարդու իրավունքների պաշտպանի տարեկան զեկույցում խնդիրներ են արձանագրվել:
Անդրադառնալով ՀՀ երկրորդ նախագահի` Ռոբերտ Քոչարյանի պահման պայմաններին, Արման Թաթոյանը հայտնեց, որ Քոչարյանը աշխատակիցների վերաբերմունքի հետ կապված դժգոհություններ չունի: Թաթոյանն ասաց, որ Քոչարյանին մի քանի անգամ այցելել և խոսել է պայմանների մասին. «Իր խցում մեկ անգամ եմ եղել, իսկ այցելել եմ մի քանի անգամ։ Սովորական խուց է, առանձնահատուկ բան չկա: Սննդի և այլ պայմանների առումով ՀՀ երկրորդ նախագահը դժգոհությումներ չի հայտնել»,-ասաց ՄԻՊ-ը:
Արման Թաթոյանի խոսքով` բացի երկրորդ նախագահ Ռոբերտ Քոչարյանից, իր զեկույցում այլ պաշտոնատար անձինք ևս ընդգրկված են՝ Միքայել Հարությունյանը, Վահագն Հարությունյանը, և Մանվել Գրիգորյանը: ՄԻՊ-ն ասաց, որ Մանվել Գրիգորյանի հետ կապված՝ լուրջ առողջական խնդիրներով պայմանավորված հարց է եղել. «Հիմա էլ Մանվել Գրիգորյանը գտնվում է «Նաիրի» բժշկական կենտրոնում, բուժումներ է ստանում և մեր կանխատեսմամբ, դա պետք է որ երկար տևի»,-ասաց Արման Թաթոյանը:
Հարցին, թե Մանվել Գրիգորյանի առողջությունն ու կալանքը համատեղելի՞ են, ՄԻՊ-ն ասաց. «Այդ հարցը քննարկվում է, և այդ առումով ես դեռ չեմ կարող գնահատական տալ»: