«Իմ մարմինն անձնական է» գրքի շնորհանդեսը տապալած ակտիվիստներին տարել են ոստիկանություն
ՀայաստանԱյսօր «Բուկինիստ» սրճարանում «Սեռական բռնության ճգնաժամային կենտրոն» ՀԿ-ն կազմակերպել էր «Իմ մարմինը անձնական է» գրքի շնորհանդեսը: Գիրքն իրազեկում է երեխայի մարմնի վտանգավոր և «վատ» հպումների մասին՝ նպատակ ունենալով կանխարգելել երեխաների նկատմամբ սեռական բռնությունը, ինչին կազմակերպությունն ականատես է լինում իր ամենօրյա գործունեության ընթացքում:
Միջոցառման ընթացքում հանդիպման վայր են մտել ակտիվիստներ, ովքեր խափանել են միջոցառումը:
Ավելի ուշ, ՀԿ-ն դիմել է ոստիկանություն շեշտելով՝ «մինչև ե՞րբ Հայաստանում ինչ-որ վայրագ խմբեր պետք է որոշեն մարդու իրավունքների օրակարգը»:
Մասնակիցներից Վահագն Չախալյանի խոսքով՝ իրենք արդեն դուրս են եկել ոստիկանության կենտրոնի բաժնից, բայց իրենց կարծիքը չեն փոխել, թույլ չեն տալու ԼԳՏՊ քարոզ երեխաների շրջանում, իսկ հետագայում իրենց կեցվածքն ավելի խիստ կլինի:
«Մենք չենք հանդուրժելու, որպեսզի այլասերվածություն քարոզվի ՀՀ-ում»,- ասում է Չախալյանը: