Կտրուկ ավելացվելու է ռազմարդյունաբերական նախագծերի ֆինանսավորումը․ Հակոբ Արշակյան
Քաղաքական«Այս մեկ տարվա ընթացքում մի շարք փոփոխություններ են եղել, որոնք, կարծում եմ՝ ակնհայտ են»,-ԼՈւՐԵՐ․com-ի հետ զրուցում ասաց ՀՀ տրանսպորտի, կապի և տեղեկատվական տեխնոլոգիաների նախարար Հակոբ Արշակյանը՝ անդրադառնալով նոր իշխանության մեկ տարվա գործունեությանը։
Նախարարը նշեց, որ հատկապես ճանապարհաշինության ոլորտում «խնամի, ծանոթ, ընկեր, բարեկամ» հարաբերություններով իրականացվող գործունեության ինստիտուտը ակնհայտորեն փոխարինվել է համակարգային լուծումներ առաջարկող մեխանիզմով․ «Մեզ հաճախ մեղադրում են, որ օրինակ՝ փոսալցման աշխատանքները դանդաղում են կամ տարբեր նախագծեր ինչու ենք ուշ սկսում և այլն։ Դրանք, իհարկե, արդարացի բողոքներ են, բայց պատճառն այն է, որ արդար մրցույթներ են տեղի ունենում և ժամանակ են պահանջում։ Եթե նախկին համակարգի պես որևէ մեկի հետ պայմանավորված լինեինք և սկսեինք հենց այդ ճանապարհները բարեկարգել, գուցե ավելի դինամիկ լիներ, բայց մենք նախընտրում ենք գործել ճիշտ և օրենքի սահմաններում»,-ասաց Հակոբ Արշակյանը։
Նախարարը հատկանշական համարեց նշել, որ նախաձեռնել են ստեղծել մի քանի այլ ինստիտուտներ, օրինակ՝ ճանապարհաշինության ոլորտում նոր ստանդարտների կիրառման, որակի վերահսկման, լաբորատորիաների վերազինման, ռեսուրսների ճիշտ օգտագործման, ինչպես նաև կադրերի անհարկի օպտիմալացման և այլն։ Նախարարի խոսքով՝ բարձր տեխնոլոգիական արդյունաբերության նախարարություն են դարձնում, որը նշանակում է, որ Հայաստանը գնում է ռազմարդյունաբերական տնտեսության ճանապարհով․ «Կտրուկ ավելացվելու է ռազմարդյունաբերական նախագծերի ֆինանսավորումը, իսկ թվայնացման համակարգի մասով՝ արվում է այնպես, որ պետությունն ավելի մոտենա քաղաքացուն։
Այսինքն, թվայնացված համակարգի արդյունքում, քաղաքացին զերծ կմնա տարբեր հիմնարկներում անձնագիր, անձնագրի պատճեն և նմանատիպ այլ փաստաթղթային խնդիրներից, քանի որ իր բոլոր տվյալները գրանցված կլինեն համակարգում և ցանկացած հաստատությունում կերևան»,-ասաց Հակոբ Արշակյանը։ Հարցին, թե ճանապարհաշինության ոլորտում ինչ քայլեր են ձեռնարկվում անբարեկարգ ճանապարհները վերանորոգելու համար, և կա՞ արդյոք ճանապարհների ցանկ, որոնք պետք է բարեկարգվեն մինչև տարեվերջ, նախարարը պատասխանեց․ «Միանշանակ կան։ Արարատից մինչև Մեղրի ընկած հատվածում բարեկարգման ենթակա է 45 կմ տարածք, անմխիթար վիճակում են նաև Արարատից մինչև Եղեգնաձոր, Գորիս տանող ճանապարհը, Եղեգնաձոր-Ջերմուկ, Սևան-Վարդենիս,Վանաձոր-Դիլիջան, Դիլիջան-Իջևան, Աշտարակ-Ապարան, Ապարան-Սպիտակ ավտոճանապարհների զգալի մասեր։
Այդ բոլոր անմխիթար հատվածները մինչև 2019 թվականի վերջ պիտի բարեկարգենք-վերջացնենք։ Ընդհանուր հաշվով, նախատեսված է այս տարի բարեկարգել 300կմ-ից ավել ավտոճանապարհ։ Վերջին 10 տարում բարեկարգման և հիմնանորոգման առումով նման թիվ չի եղել»,- ասաց նախարարը։
Հարցին, թե օրեր առաջ Արագածոտնի մարզի Վարդաբլուր գյուղի բնակիչների բողոքին՝ կապված իրենց միջհամայնքային ճանապարհի բարեկարգմանը հետևողական լինելու է և հնարավոր է, որ այդ ճանապարհը ևս ներառվի այս տարի բարեկարգվող ճանապարհների մեջ, Հակոբ Արշակյանը պատասխանեց․ «Շատ դժվար է այս տարվա ցանկում որևէ նոր բան ներառել, որովհետև մրցույթներն արդեն հայտարարվել են և բավականին երկար ժամանակ են պահանջում։ Այնուամենայնիվ, դա կախված է գնահատականից, տեսնենք, թե ինչ վիճակում է այդ ճանապարհը, հասկանանք, թե ինչպիսի սոցիալական և տնտեսական հարց է լուծում դա, ինչ գումարների հետ է կապված»,-ասաց Հակոբ Արշակյանը՝ նշելով, որ հիմա հանրապետական և միջպետական ճանապարհների խնդիր են լուծում, իսկ համայնքային ճանապարհներն այլ ծրագրերով են բարեկարգվելու։
Սիլվի Տիգրանյան