Մարտահրավերը լուրջ չէ. իմքայլականը հակահեղափոխության նշաններ չի տեսնում
Քաղաքական«Հաշվի առնելով այն հանգամանքը, որ ՀՀԿ-ն մերժվել է և համախմբում է տեղի ունենում նախկին իշխանության և Ռոբերտ Քոչարյանի միջև, պիտի նշեմ, որ գիտակից քաղաքացին, հեղափոխություն ասելով՝ շատ լավ է պատկերացնում, թե ինչ է տեղի ունեցել»,- ԼՈւՐԵՐ․com-ի հետ զրույցում ասաց ԱԺ «Իմ քայլը» խմբակցության պատգամավոր Արմեն Փամբուխչյանը՝ անդրադառնալով արտախորհրդարանական ուժերի մարտահրավերներին և ՀՀ երկրորդ նախագահ Ռոբերտ Քոչարյանի այն հայտարարությանը, թե կմիանա նոր իշխանության դեմ պայքարող ուժերին։ Պատգամավորը նշեց, որ հնարավոր է՝ հանրության մեջ լինեն որոշակի դժգոհություններ, սակայն ինքը վստահեցնում է, որ բոլոր խնդիրներն ի վերջո լուծվելու են։
«Ես՝ որպես շարքային քաղաքացիների հետ հաճախ շփում ունեցող գործիչ, հաշվի առնելով նրանց որոշակի դժգոհությունները տարբեր հարցերի վերաբերյալ, կարող եմ վստահեցնել, որ նրանք, այդուամենայնիվ, չեն տեսնում նախկինների վերադարձը։ Նախկինների վերադարձը տեսնում են միայն նրանք, ովքեր զրկվել են որոշակի արտոնություններից և վախ կա իրենց մեջ, որ կզրկվեն նաև իրենց ունեցվածքի մյուս մասից։ Նրանց միավորումը չի լինելու ժողովրդական ալիք»,-ասաց պատգամավորը։
Հարցին, թե նրանց միավորումը կարո՞ղ է լինել մարտահրավեր նոր իշխանությանը և հանգեցնել հակահեղափոխության, Արմեն Փամբուխչյանը պատասխանեց․ «Չի կարող լինել մարտահրավեր օրինական ընտրված և ժողովրդի վստահությունը վայելող իշխանությանը։ Հատկապես՝ չի կարող մարտահրավեր լինել այն իշխանությանը, որն ամեն ինչ անում է, որպեսզի քաղաքացիների հավասարության օրենքը գործի։ Հաշվի առնելով նաև այն, թե ովքեր են կազմակերպում իշխանության դեմ կազմակերպվող բողոքները, ես համարում եմ, որ դա այնքան էլ լուրջ չէ»,-ասաց նա։ Ամփոփելով իր խոսքը, պատգամավորը կառավարության մեկ տարվա գործունեությունը գնահատեց հետևյալ կերպ․
«Արվում են այնպիսի քայլեր, որ այն բոլոր խոսքերը, որոնք հնչել են հեղափոխության օրերին՝ իրականանան և ունենանք այնպիսի Հայաստան, որին ձգտում ենք։ Քայլերի մի մասն արվել է, մի մասը դեռ արվելու է»։
Սիլվի Տիգրանյան