Ռոբերտ Քոչարյանի և մյուսների գործի կասեցումը էլ ավելի է սրում իրավիճակը. Մանե Թանդիլյան
ՔաղաքականՀՀ երկրորդ նախագահ Ռոբերտ Քոչարյանի և մյուսների գործի կասեցումը էլ ավելի սրում է իրավիճակը և ի ցույց է դնում, որ այն հայտարարությունները, որ տեղի ունեցան երեկ, հենց կապված էին Քոչարյանի կալանքի փոփոխման հետ։ Այս մասին այսօր՝ մայիսի 21-ին, լրագրողների հետ զրույցում ասաց «Լուսավոր Հայաստան» խմբակցության պատգամավոր Մանե Թանդիլյանը։
Խոսելով դատարանների մուտքերն ու ելքերը փակելու ՀՀ վարչապետ Նիկոլ Փաշինյանի կոչի առնչությամբ «Լուսավոր Հայաստանի» հրավիրած արտահերթ նիստից, նա նշեց. «Կարծում եմ` մենք արձանագրում ենք, որ արտառոց իրավիճակ էր և բազմաթիվ հարցեր կան, որ ԱԺ տիրույթում կարող են քննարկվել, եթե չասեմ, որ հենց իր տիրույթում են: Նաև նկատի ունեմ՝ անցումային արդարադատության գործիքակազմը, որովհետև այսօր բոլորը խոսում են այդ մասին, բայց ոչ ոք մեծ հաշվով չի պատկերացնում դա: Պարոն Փաշինյանի հայտարարությունը վեթթինգի մասին, դուք նաև գիտեք մենք ենք այդ մասին խոսել մինչ այդ, գործողություն, սակայն, որպես այդպիսին, այսօր չենք տեսել: Եվ այդ նույն վեթթինգը իսկապես կարելի էր և պետք է իրականացվեր առաջին իսկ օրը, երբ տեղի ունեցավ իշխանության փոփոխություն: Պետք է դա անեինք ու նոր անցնեինք դատական պրոցեսներին, որ կան այսօր երկրում և որոնց պատճառով, ինչու ոչ, տեղի ունեցավ հրատապ այն ակցիաներն ու հայտարարությունները, որ տեղի ունեցան երեկ»։
Թանդիլյանի խոսքով՝ ԼՀԿ–ն պատրաստ է աջակցել դատարնների բարեփոխման ու դրանցում վեթիինգի անցկացմանը: