ՓՊ-ն առաջարկում է ծրագիր, որով անվճարունակ քաղաքացիներին կտրամադրվի անվճար իրավաբանական աջակցություն
ԻրավունքԱյսօր Ազգային ժողովի Մարդու իրավունքների և հանրային հարցերի մշտական հանձնաժողովի նիստի ժամանակ, Փաստաբանների պալատի նախագահ Արա Զոհրաբյանը ներկայացրեց քննարկվող ծրագիրը, ըստ որի՝ անվճարունակ քաղաքացիներին պետք է տրամադրվի անվճար իրավաբանական աջակցություն։ Ծառայությունների դիմաց փաստաբանները կստանան ավելի ցածր գումար, ծառայությունը փաստաբանները կմատուցեն իրենց ցանկությամբ։ Ճեպազրույցի ընթացքում Արա Զոհրաբյանը պարզաբանեց ծրագրի էությունը.
«Գիտենք, որ ամեն տարի գործերի թիվն ավելանում է և ավելանում է նաև հանրային պաշտպանի գրասենյակ դիմողների թիվը։ Առաջարկվող ծրագրի համաձայն, բացի հանրային պաշտպաններից, ովքեր ստանում են աշխատավարձ և ծանրաբեռնված են, կստեղծվի մի հարթակ, որտեղ հանրային պաշտպան չհանդիսացող փաստաբանները, ովքեր կցանկանան ցածր գներով ծառայություն մատուցել անվճարունակ մարդկանց, կներառվեն այդ ցանկում։ Քաղաքացու համար ծառայությունը լինելու է անվճար, այն վճարվելու է ֆոնդից, որը ձևավորվելու է պետական ֆոնդից: Պալատի խորհուրդը սահմանելու է գործերի գնացուցակ»,-ասաց Զոհրաբյանը։
Զոհրաբյանի խոսքով՝ լինելու են նաև զտման մեխանիզմներ, որոնց արդյունքում բացահայտվելու են վճարունակ քաղաքացիները, ովքեր խուսափում են վճարից։ Գործի վերջում, անձի վճարունակությունը պարզելուց հետո, նա պարտավորված կլինի վճարել ծառայության դիմաց։ Զոհրաբյանը նկատեց` արդյունքում և՛ քաղաքացու իրավունքներն են պաշտպանվում, և՛ փաստաբանն է զբաղվածություն ունենում, և՛ պետությունը կատարում է ավելի քիչ ծախսեր: