Ես հանդիպման էի, երբ իմացա, որ իմ անունն են վանկարկում. Մակունց
Քաղաքական«Եթե մի գործընթաց լինելու է գաղտնի քվեարկությամբ, ապա ճիշտ չեմ համարում այդ առումով նախապես դիրքորոշում հայտնելը»,- այս մասին Ազգային ժողովում ասաց «Իմ քայլը» խմբակցության ղեկավար Լիլիթ Մակունցը` անդրադառնալով ՍԴ դատավորի պաշտոնում Վահե Գրիգորյանի թեկնածությանը:
Մակունցը հրաժարվեց այդ հարցի շուրջ քաղաքական գնահատական տալ` նշելով, որ քիչ առաջ է տեղեկացել Վահե Գրիգորյանի առաջադրման մասին: ԼՈւՐԵՐ.com-ի հարցին, թե, այնուամենայնիվ, Վահե Գրիգորյանի` իրենց թիմակիցը լինելու փաստը ոչ մի կերպ չի՞ կարող ազդել ընտրության վրա, քանի որ Աժ նախագահը չթաքցրեց, որ մտերիմ է նրա հետ և շատ դրական է գնահատում Վահե Գրիգորյանի թեկնածությունը, Մակունցն ասաց, որ չի կարծում, թե կոնկրետ իր դիրքորոշման վրա կազդի:
Մեր հարցին` առավոտից ԱԺ-ի դիմաց բողոքի ակցիա է ընթանում` ընդդեմ Հարկային օրենսգրքի փոփոխությունների, և ցուցարարները վանկարկում էին Ձեր անունը` պահանջելով հանդիպում, եղա՞վ հանդիպումը, եկա՞ք ընդհանուր հայտարարի, Մակունցը պատասխանեց. «Ես հանդիպման էի, երբ իմացա, որ իմ անունն են վանկարկում և հենց այդ կողմով մուտք գործեցի Ազգային ժողով: Խոսեցի նրանց հետ, իրենք ինձ նամակ են փոխանցել, որպեսզի այն տամ պարոն Թունյանին: Պարոն Թունյանը բովանդակային քննարկման առաջարկ է արել և կարծում եմ, որ այն երիտասարդները, ովքեր ուզում են իրենց դիրքորոշումը հայտնել, պիտի աշխատանքային հարթակում դա տեղի ունենա: Նրանք կարծես թե համաձայնեցին, ամեն դեպքում՝ ես այդ տպավորությամբ հեռացա»,- եզրափակեց Լիլիթ Մակունցը:
Սիլվի Տիգրանյան