Աղվան Հովսեփյանն էլ պետք է բացատրություններ տա, թե ինչպես էին հնարավոր այդքան կոծկումներ
ՔաղաքականՄարտի մեկի գործի առիթով փաստահավաք խմբի շրջանակներում խմբի ղեկավար, ներկայում՝ ԱԺ պատգամավոր Անդրանիկ Քոչարյանը երկու անգամ հարցաքննություն է ունեցել մարտի 1-ին Զաքար Հովհաննիսյանին սպանելու կասկածանքով ձերբակալված Գեղամ Պետրոսյանի հետ։
Խորհրդարանական ճեպազրույցների ժամանակ, հարցին՝ այդ ժամանակ Քոչարյանը պատկերացնո՞ւմ էր, որ կարող է հենց Գեղամ Պետրոսյանն է սպանել Հովհաննիսյանին, Անդրանիկ Քոչարյանը պատասխանեց, որ այո, և առաջին անգամ իրենց չէին բավարարել նրա պատասխանները, երկրորդ անգամ են կանչել՝ այլ պարզաբանումների համար․ «Ներքին զորքերի այլ աշխատակիցների, հատկապես՝ հայտնի Արթուր Դաստակովից հետո, մենք նորից ենք կանչել Պետրոսյանին։ Մեզ մոտ, իհարկե, կասկածներ եղել են թե՛ զինված ապօրինի խմբավորումների անհամաչափ ուժ կիրառման, և թե՛ այլ հարցերի վերաբերյալ»,-ասաց Քոչարյանը՝ նշելով, որ երբ ձերբակալման մասին հաղորդագրությունը կարդաց, որտեղ սպանության կասկածանքի մասին է նշված, վստահ կարող է ասել՝ բոլոր սպանությունները բացահայտվելու են․ «Գործը կոծկողներից կարևոր մեկը այսօր փախուստի մեջ է, նախկին գլխավոր դատախազ Աղվան Հովսեփյանն էլ պետք է բացատրություններ տա, եթե չի տվել, թե ինչպե՞ս դատախազի պաշտոնը զբաղեցնելով՝ հնարավոր էին այդքան կոծկումներ»։
Անդրանիկ Քոչարյանն ասաց, որ կարելի է նոր բացահայտումներ սպասել, որովհետև նախաքննական մարմինը ցույց տվեց, որ հետևողական մեծ ծավալի աշխատանք է անում։