ՀՔԾ պետը՝ Գեղամ Պետրոսյանի լռության և Մարտի 1-ի մասին
Քաղաքական«Ես չեմ կարող կանխակալ կարծիք արտահայտել», -այսօր Ազգային ժողովում լրագրողների հետ զրույցում ասաց Սասուն Խաչատրյանը։ Նա նշեց, որ Գեղամ Պետրոսյանը ցուցմունք չի տվել։ ՀՔԾ պետը նշեց, որ չի ցանկանում բարձրաձայնել մնացած ցուցմունքների բովանդակությունները։ Խաչատրյանը ընդգծեց, որ Մարտի 1-ի տասը զոհերի սպանությունները պետք է բացահայտվեն։
«Իհարկե, բարդություններ կան։ Անցել է 11 տարի, գիտենք, որ բազմաթիվ իրեղեն ապացույցներ կեղծվել են։ Այդ ամենը օբյեկտիվորեն դժվարացնում է մեր աշխատանքը։ Ես մի առիթով ասել եմ, որ լավատես եմ, և մենք ամեն ինչ անելու ենք բոլոր սպանությունները բացահայտելու համար»,-ասաց Խաչատրյանը։ Գեղամ Պետրոսյանին մեղադրանք առաջադրելու վերաբերյալ Սասուն Խաչատրյանը միայն ասաց, որ կա ապացույցների բավարար համակցություն. դա ակնհայտ է։
Մյուս հարցերը նախաքննական գաղտնիք են։ Լրագրողները հարցրին՝ եթե Պետրոսյանը չի խոսում, ապա ինչպե՞ս է հնարավոր բացահայտումներ անել, ՀՔԾ պետն ասաց՝ «Մինչ այսօր էլ ոչ ոք չէր խոսում, բայց ունեցանք բացահայտում»։ Նոր բացահայտումների վերաբերյալ Խաչատրյանն ասաց, որ իրենց ունեցած բոլոր նյութերը ուղարկել են դատարան և դատարանում, դատաքննության ընթացքում հանրությունը կտեսնի այդ ապացույցները և բացահայտումները։ Սասուն Խաչատրյանը նշեց, որ գործը փակուղի չմտնելու համար պետք է աշխատեն բոլոր կառույցները։ Նա կոչ արեց նաև հասարակությանը, բոլոր նրանց, ովքեր ունեն տեղեկություններ Մարտի մեկի դեպքերի վերաբերյալ՝ ներկայանան ՀՔԾ և հայտնեն իրենց ունեցած բոլոր տեղեկությունները։ ՀՔԾ պետը ընդգծեց, որ նման մարդիկ արդեն եղել են։
Ասպրամ Փարսադանյան