Արսեն Թորոսյանը չի գիտակցում, որ ՀՀ-ում օրենքը գերակա է և բոլորի համար. Մարինա Խաչատրյան
ՀասարակությունՎահե Տեր-Մինասյանն այս պատմության միակ օրինախախտը չէ։
Ս.թ. մարտի 22-ին ասուլիսի ժամանակ ես նշեցի, որ Հայաստանի Հանրապետությունում մի խումբ անձանց կողմից իրականացվում է «Գարդասիլ» պատվաստանյութի գովազդ` մեջբերելով և ցուցադրելով փաստեր։ Այս իրավախախտման մասին նշված է եղել նաև ՀՀ ԱԱԾ, ՀՀ Պետական վերահսկողական ծառայություն, ՀՀ Դատախազություն, ՀՀ Ոստիկանություն, ՀՀ Հատուկ Քննչական Ծառայություն և ՀՀ ՄԻՊ հանցագործության մասին իմ կողմից ներկայացված հաղորդումներում։
Իմ հայտարարությունից հետո «Գարդասիլի» ակտիվ գովազդով զբաղվող անձինք մի պահ նվազեցրեցին այդ հակավիրուսային պատվաստանյութի ինտենսիվ գովազդը։
Սակայն, բժիշկ Վահե Տեր-Մինասյանը նույն օրը հանցազրույցի ընթացքում հայտարարեց, որ «...ոչ միայն գովազդում ենք, այլ ես ասում եմ, որ մեր հաղորդաշարը շարունակելու է գովազդել...»։
Տե՛ս 10:00 րոպեից։
Սա եղավ պատճառ, որ ես իրավախախտման մասին հաղորդում ներկայացրեցի ՀՀ Առողջապահական և աշխատանքի տեսչական մարմին։
Տեսչական մարմինն օրենքով սահմանված ժամկետներում հրավիրեց նիստ, որին ներկա ենք եղել և՛ ես, և Վահե Տեր-Մինասյանը։ Ես ներկաներին պարզաբանել եմ, որ բժիշկ-ուռուցքաբան Վահե Տեր-Մինասյանի կողմից հնչեցված արտահայտությունը «...ոչ միայն գովազդում ենք, այլ ես ասում եմ, որ մեր հաղորդաշարը շարունակելու է գովազդել...» հանդիսանում է անհերքելի ապացույց ՀՀ Դեղերի և ՀՀ Գովազդի մասին օրենքների մի շարք կետերի խախտման վերաբերյալ։
Վերջերս տեղեկացանք, որ Վահե Տեր-Մինասյանը տուգանվել է 250.000 ՀՀ դրամի չափով։ Իմ գնահատմամբ Առողջապահության և աշխատանքի տեսչական մարմինը չափազանց մեղմ է գտնվել և շատ քիչ վարչական տուգանք է նշանակել օրինախախտ այս քաղաքացուն։ Ես ավելի կոշտ արձագանք էի ակնկալում։
Հետագա օրերին, Վահե Տեր-Մինասյանը չգիտակցելով, որ օրենքի մի շարք կետերի խախտման համար անհրաժեշտ է պատասխան տալ օրենքի առջև, փորձ կատարեց մանիպուլյատիվ եղանակներով վարկաբեկել տեսչական մարմինը` սպառնալով, որ «Գարդասիլ» արտասանած բոլոր անձանց նկատմամբ դիմում կներկայացնի տեսչական մարմին և բոլորը, այդ թվում նաև պատգամավորներ, վարչապետն ու իր կինը կտուգանվեն։ Վահե Տեր-Մինասյանն այդպես էլ չկարողացավ ըմբռնել, որ օրինախախտում է ոչ թե «Գարդասիլ» արտասանելը, այդ «Գարդասիլի» գովազդը (այս խմբաքանակը գրանցված չէ և ՀՀ ԱՆ-ն թույլատվություն չի տվել դրա գովազդի համար)։
Սակայն, Վահե Տեր-Մինասյանն այս պատմության միակ օրինախախտը չէ։
Երեկ հրապարակվեց մի հոդված, որտեղ նշվում էր, որ ս.թ. հունիսի 11-ին Առողջապահական խորhրդի նիստի ընթացքում ՀՀ առողջապահության նախարարի աթոռը զբաղեցնող Արսեն «Թորոսյանը վրդովված է եղել, թե ինչու է տեսչական մարմնի ղեկավարը տուգանել իր նախկին խորհրդական Վահե Տեր-Մինասյանին, իսկ երբ Էդգար Խուրշուդյանն ասել է, որ այլ բան չէր կարող անել՝ կար քաղաքացու ահազանգ, նախարարը բղավել է՝ «պասլա՛տ անեիր» այդ քաղաքացուն։ Խոսքն այն մասին է, որ Վահե Տեր-Մինասյանը գարդասիլի պատվաստանյութի գովազդ է արել եթերում»։
Հավանաբար, այսպիսի արտահայտություններով է Թորոսյանն, օրինակ, կանգնեցնում մյուս խնդիրների դեմ բարձրաձայնողների բողոքները, «առաջ բրդում» Գարդասիլը, «Անծուխ Հայաստանը» և այլ հանցավոր ծրագրեր։
Ես հասկանում եմ, որ Թորոսյանն իր տանը կնոջ ու երեխաների, ծնողների ու հարևանների հետ խոսում է բացառապես օգտագործելով «ժարգոնային» լեքսիկոն։ Ես հասկանում եմ նաև, որ նա ուսանող ժամանակ եղել է կտրված լավ շրջապատից ու հիմա փորձում է «լավ տղա» խաղալ։ Ես հասկանում եմ, որ նա փոքր ժամանակ հեծանիվ չի ունեցել, հիմա մեծացել է, ունի ծառայողական մեքենա, բայց միևնույն է, նա փոքր ժամանակ հեծանիվ չի ունեցել։
Բայց ես չեմ հասկանում, թե փողոցային լեքսիկոնով ու վարվեցողությամբ, ՀՀ քաղաքացիների նկատմամբ նման վերաբերմունք ունեցող, մեր պետական կրոնն ատող ու մեր երկիրն ակնհայտորեն փորձադաշտ դարձրած անձն ինչ գործ ունի որոշումներ կայացնողների շարքում։
Այսպիսով, Արսեն Թորոսյանը չի գիտակցում, որ Հայաստանի Հանրապետությունում օրենքը գերակա է և բոլորի համար։ Օրենքին են ենթարկվում անտունից մինչև օլիգարխ, գործազուրկից մինչև վարչապետ, փինաչիից մինչև գիտնական։ Հայաստանի Հանրապետությունում չպետք է լինեն արտոնյալներ ու օրենքից մանյովրող անձինք։
Թորոսյանը չի գիտակցում նաև, որ տեսչական մարմինն անկախ գործող համակարգ է և պարտավոր է վերահսկել, բարձրաձայնել իրավախախտումները և նշանակել պատիժ։
Հ.Գ. Ի դեպ, ուղղաթիռով վոյաժներ անելու Ձեր սովորությունը Ձեզ չի հավասարեցնում վարչապետ Փաշինյանին։ Դուք երբեք չեք ունենա վարչապետի խարիզման ու նմանօրինակ ընկալումը հասարակության կողմից։
«Առողջ Հանրություն» ՀԿ նախագահ,
բժիշկ-նեյրովիրաբույժ՝
Մարինա Խաչատրյան