Իմ իմանալով, Չեխիայի արդարադատության նախարարը եղբորս արտահանձնելու վերաբերյալ համաձայնություն չի տվել. Հայկ Սարգսյան
ԻրավունքԱլեքսանդր Սարգսյանի որդու՝ Հայկ Սարգսյանի տեղեկություններով՝ Չեխիայի արդարադատության նախարարը եղբորը՝ Նարեկ Սարգսյանին արտահանձնելու վերաբերյալ համաձայնություն չի տվել։ Այս մասին այսօր դատարանում լրագրողների հետ զրույցում հայտարարեց 3-րդ նախագահ Սերժ Սարգսյանի եղբորորդին՝ Հայկ Սարգսյանը:
«Իմ իմանալով, Չեխիայի արդարադատության նախարարը եղբորս արտահանձնելու վերաբերյալ համաձայնություն չի տվել»,-ասաց նա։
Անդրադառնալով հոր՝ Սաշիկ Սարգսյանի գտնվելու վայրին՝ Հայկ Սարգսյանը նշեց, որ նա բուժման նպատակով գտնվում է արտերկրում։
Ավելի վաղ ԼՈՒՐԵՐ․com-ին ՀՀ գլխավոր դատախազությունից հայտնել էին, որ Պրահայի մունիցիպալ դատարանը բավարարել է Նարեկ Սարգսյանին ՀՀ իրավասու մարմիններին հանձնելու միջնորդությունը: ՀՀ գլխավոր դատախազության դիմումի հիման վրա Չեխիայի օրենսդրական իրավակարգավորումների և ընթացակարգերի պահպանմամբ Նարեկ Սարգսյանի հանձնման գործընթացը բնականոն շարունակվում է։
Հիշեցնենք` 2018թ․ հուլիսից միջազգային հետախուզման մեջ գտնվող Նարեկ Սարգսյանին հայտնաբերել և ձերբակալել էին Պրահայում՝ 2018թ․ դեկտեմբերին։ Փաստաթղթերի ստուգման ժամանակ նա ներկայացրել էր Գվատեմալայի քաղաքացու կեղծ անձնագիր՝ Ֆրանկլին Գոնսալես անունով:
Հունիսի 26-ին հարուցվել էր քրեական գործ՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելու, իրացնելու, պահելու, փոխադրելու կամ կրելու և թմրամիջոցների, հոգեմետ (հոգեներգործուն) նյութերի և դրանց պրեկուրսորների ապօրինի շրջանառությունն իրացնելու կամ պատրաստելու նպատակով կամ դրանց ապօրինի իրացնելու հատկանիշներով: