Շղթա, որի միջոցով Ռոբերտ Քոչարյանին 3 մլն դոլար է փոխանցվել
ԻրավունքԱյսօր Վերաքննիչ դատարանում Ռոբերտ Քոչարյանի, Յուրի Խաչատուրովի, Սեյրան Օհանյանի և Արմեն Գևորգյանի գործով դատական նիստում մեղադրող դատախազները ներկայացնում են վերաքննիչ բողոքները։
Անդրադառնալով Քոչարյանին առաջադրված խոշոր չափով կաշառք վերցնելու մեղադրանքին, դատախազ Պետրոս Պետրոսյանը նշեց, որ դատարանն իր տրամադրության տակ ունի բավարար փաստեր, ըստ որի՝ Վարդան Օսկանյանը միջնորդ է եղել Սիլվա Համբարձումյանի ու Քոչարյանի միջև 3 մլն դոլար փոխանցելուն․ «Դատարանն ունի ապացույցներ՝ որպես վկաներ հարցաքննված Սիլվա Համբարձումյանի, Լևոն Ալթունյանի և Անահիտ Իսրայելյանի ցուցմունքները, Սիլվա Համբարձումյանի, Վարդան Օսկանյանի և Սամվել Մայրապետյանի առերես հարցաքննության արձանագրությունները, առգրավված և զննության ենթարկված «Լեկալ Դեվելոփերս», «Պրինսթոն գրուպ» ընկերությունների բանկային գաղտնիք համարվող տեղեկությունները, ոստիկանությունից ստացված գրությունը, ՀՔԾ-ում քննվող մեկ այլ գործի զննության արձանագրության վերաբերյալ։ Սակայն հարցաքննությունների բովանդակությունը հրապարակային դատաքննության ժամանակ չենք կարող բարձրաձայնել»,-դատարանում հայտարարեց դատախազ Պետրոս Պետրոսյանը։
Նրա խոսքով՝ զննության արձանագրությունները, որոնք կցված են ՀՔԾ վարույթում քննվող գործին, վերաբերվում են Սիլվա Համբարձումյանի կողմից հանքավայրեր ձեռք բերելու հարցում հովանավորչություն ստանալու նպատակով՝ Վարդան Օսկանյանի միջոցով Ռոբերտ Քոչարյանին դիմելու, նրա համաձայնությունը ստանալու ու մինչև 2008 թ․ մայիսը Մայրապետյանի միջոցով 3 մլն ԱՄՆ դոլար Ռոբերտ Քոչարյանին փոխանցելուն։
«Տեղեկությունները ներառված են Սիլվա Համբարձումյանի ցուցմունքներում, որոնք, ըստ էության, հաստատված են նաև Վարդան Օսկանյանի՝ չժխտող ցուցմունքներով, ինչպես նաև զննված արձանագրություններով ու այլ ֆինանսական փաստաթղթերով», - նշեց դատախազը։