Բանակում արատավոր երևույթների վերացման ուղղությամբ իրականացվում է համալիր աշխատանք
ՀասարակությունՀայաստանի զինված ուժերի գլխավոր շտաբի պետ Արտակ Դավթյանը անդրադարձավ բանակում իրար հաջորդած ինքնասպանության երկու դեպքերին և ցավ հայտնեց տեղի ունեցածի կապակցությամբ:
Դիտարկմանը, որ հարազատները չեն հավատում ինքնասպանության վարկածին՝ ԳՇ պետը պատասխանեց, որ բոլոր հարցերի պատասխանները կտա իրականացվող հետաքննությունը և դատարանի որոշումը։ «Հարազատների ընդունելը կամ չընդունելը չեմ կարող մեկնաբանել, դա անձնական կարծիք է, և քրեական գործի շրջանակներում կպարզվի։ Երկու ինքնասպանությունը, ցավոք սրտի, ժամանակային առումով համընկան։ Յուրաքանչյուր զինծառայողի հետ կապված դեպք մեզ համար ցավալի է, բայց դեպքերի վերաբերյալ կարող եմ ասել, որ եթե հասարակության մեջ չլիներ ինքնասպանություն, չէր լինի նաև բանակում»,- ասաց Արտակ Դավթյանը։
Հարցին՝ արդյոք հրամանատարների կողմից աշխատանք տարվում է նմանատիպ երևույթները թիվը նվազեցնելու ուղղությամբ, ԳՇ պետն ասաց, որ եթե հրամանատարները չաշխատեն, ինքնասպանության դեպքերը կլինեն ոչ թե 2, այլ 12։ «Իհարկե աշխատում են, այս տարի 2 կամ 3 անվանական դեպք է եղել, երբ կանխվել է ինքնասպանության փորձը։ Չի կարելի ասել, թե չենք աշխատում, չենք մտածում կամ ինքնահոսի արդյունք է: Եթե մեղավորներ կան, պետք է պատասխանատվության ենթարկվեն: Կոնկրետ քրեական գործի արդյունքներով կծանոթանանք հիմքերին, պատճառներին, եթե մեղավորներ կան, մեղավորները միանշանակ պետք է պատասխան տան, եթե ինքնասպանության են հասցրել, իհարկե հասցնողն օրենքով նախատեսված դրույթով պատասխան պետք է տա, եթե հրամանատարն է մեղավոր, պետք է հրամանատարը պատասխան տա»,- ընդգծեց Դավթյանը:
Նա նշեց, որ բանակում առկա արատավոր երևույթների վերացման ուղղությամբ համալիր աշխատանք է իրականացվում, վիճակագրությունը ցույց է տալիս, որ այս տարի զորամասն ինքնակամ լքած զինծառայողների թվի մի քանի անգամ կրճատում է նկատվել։