Դավիթ Անանյանը՝ իր հրաժարականի լուրերի մասին
ՔաղաքականՄեր արդեն նախկին գործընկերները պաշտոնից հեռանալուց հետո են որոշակի մեկնաբանություններ տվել և այդ մեկնաբանությունները տալու պահին պետական պաշտոնյա չեն եղել: Այս մասին այսօր՝ սեպտեմբերի 19-ին, լրագրողների հետ զրույցում նշեց ՊԵԿ նախագահ Դավիթ Անանյանը՝ անդրադառնալով այն հարցին, որ ուժային կառույցի ղեկավարները նշել են, որ վարչապետի որոշմամբ են հրաժարական տվել:
«Հետևաբար, ճիշտ կլինի, որ իրենց ասածների վերաբերյալ մեկնաբանություն տան հենց իրենք»,- ասաց նա:
Անդրադառնալով իր պաշտոնանկության մասին մամուլի հրապարակումներին՝ Անանյանն ասաց. «Ճիշտն ասած՝ չեմ հետևել մամուլին, եթե այդպիսի բան կա, համենայնդեպս, այսօր առավոտյան վարչապետի հետ աշխատանքային քննարկում ենք ունեցել, քննարկել ենք մեր առօրյա հոգսերը, սովորական գործերը՝ կապված Գյումրիի ավտոմաքսատան հետ, հարկահավաքման պրոցեսների հետ, առաջիկա անելիքների հետ»:
Հարցին, թե այսինքն՝ վարչապետի կողմից դժգոհություններ չկա՞ն, ՊԵԿ նախագահն ասաց. «Եթե ասեմ դժգոհություններ չկան, ճիշտ ասած չեմ լինի, որովհետև ես ինքս որպես ղեկավար միշտ դժգոհում եմ այս կամ այն աշխատանքների թերակատարման համար: Բայց առողջ դժգոհությունը, ինչ-որ տեղ նաև մոտիվացիոն դժգոհությունը պետական կառավարման համար շատ կարևոր ատրիբուտ է: Ձեր հարցերի ենթատեքստով, որը ես կռահում եմ, դժգոհություն չկա»: