Սիրիայում իրավիճակից դուրս գալու միակ լուծումը միասնական քայլերն են. արաբագետը՝ սիրիահայ համայնքի ճակատագրի մասին
ՀասարակությունՍիրիայի հյուսիսում լայնամասշտաբ ռազմական գործողություններ չկան, սակայն լոկալ առումով թեժ մարտեր կան, որոնց արդյունքում երկու կողմից էլ կան զոհեր: Այս մասին այսօր լրագրողների հետ զրույցում հայտարարեց արաբագետ Սարգիս Գրիգորյանը: Ըստ բանախոսի՝ այս իրավիճակից դուրս գալու միակ ելքը պետք է լինի համատեղ միասնական քայլերը, դիրքորոշումը:
«Թուրքիան այսօր Սիրիայի քրդաբնակ հատվածներում վտանգ է զգում հատկապես PKK-ի («Քրդստանի աշխատավորական կուսակցություն») կողմից: Այս առումով վտանգ կա նաև հատկապես հայ համայնքի հետ կապված: Մինչև հակամարտությունը այստեղ մինչև 5000 հայ էր ապրում՝ Եփրատից մինչև արևելք ընկած հատվածում, որից որոշակի հատվածը դեռ մնացել է: Հայ համայնքի անվտանգության ապահովման այս պահի միակ արդյունավետ գործիքը սիրիահայ համայնքի միասնականությունն է: Նրանք կարող են տեղերում ունենալով ինֆորմացիա` այս կամ այն խնդիրներին լուծում տալ՝ տարհանել, բանակցել կողմերի հետ»,- նշեց Գրիգորյանը:
Ըստ բանախոսի՝ բախումներ տերությունների միջև, օրինակ՝ Թուրքիա-Ռուսաստան, ԱՄՆ-Ռուսաստան, Թուրքիա-Իրան չի լինի:
Հարցին՝ կա արդյոք անհրաժեշտություն ռազմական առաքելություն ուղարկելու Սիրիա, արաբագետը նշեց, որ քանի որ կա էսկալացիա, այլ առաքելություն պետք չէ ուղարկել:
«Մեր այնտեղի առաքելությունը խաղաղապահ առաքելություն է իրականացնում՝ բժիշկներ են, ականազերծներ և այլն: Այս պարագայում Սիրիայի հարցում ՀՀ ակտիվությունը բավական լուրջ հետևանքներով է լեցուն: Ես բացառում եմ, որ խոշոր խաղացողների կողմից ՀՀ-ին միջամտելու կոչ կլինի»,-ասաց նա: