«Կապ չունի ով ում հայրն է, հուզական դաշտ չպետք է տանել»
ՔաղաքականԱԺ փոխնախագահ Ալեն Սիմոնյանը լրագրողների հետ զրուցել է Սահմանադրական դատարանի աշխատակարգային որոշման, իրավապահ մարմինների կողմից Հրայր Թովմասյանի հայրական տուն այցի և, իր իսկ բնորոշմամբ, ՍԴ ճգնաժամը լուծելու հետագա քայլերին:
Հրայր Թովմասյանի հայրական տուն ԱԱԾ քննիչների այցը Ալեն Սիմոնյանը խնդրեց չտեղափոխել հուզական դաշտ. «Նախկին իշխանության ներկայացուցիչները մի լավ ավանդույթ են ունեցել՝ իրենց ունեցվածքը գրանցել իրենց բարեկամների անունով: Եվ հիմա տարօրինակ չէ, որ իրավապահ մարմինները փորձում են ճշտել՝ արդյոք այդ գրանցված գույքը իրավական ճանապարհով է ձեռք բերվել: Կապ չունի ով ում հայրն է, բարեկամն է, քանի տարեկան է: Ինձ հետ կապված նույնպես դեպքեր են եղել, երբ բաժին եմ գնացել, ցուցմունք եմ տվել: Բայց ես դա չեմ համարել իմ նկատմամբ քաղաքական հետապնդում: Հուզական դաշտ չպետք է տանել, իրավապահ մարմիններն իրենց աշխատանքն են անում ու անում են շատ հանգիստ եղանակով»:
Նա պնդեց, որ քննիչների այցը ոչ մի կապ չի կրող ունենալ ՍԴ որոշման հետ. «Մենք այն տրամաբանությամբ չենք շարժվում, որ ՍԴ-ն վարույթ չի ընդունել, ուրեմն պետք է գնան ինչ-որ մեկի հորը բերեն, մորը բերեն: Սա իրենց պրիմիտիվ, տափակ տրամաբանությունն է: Մարդկանց պատժելը, ճնշելը, կեղծելն ու ստելը իրենց ոճն է, թող մեզ իրենց չափանիշներով չդատեն»:
ՍԴ-ում տիրող իրավիճակը փոխնախագահը որպես ճգնաժամ որակեց և վստահեցրեց, որ այդ ճգնաժամը լուծողը իրենք են լինելու. «ՍԴ-ում կա ճգնաժամ, և այդ ճգնաժամը պիտի լուծվի՝ կիրառելով բացառապես բոլոր իրավական ճանապարհները: Կլինի Արման Բաբաջանյանի նախագիծը, Վահե Գրիգորյանի առաջարկը, թե նոր մեխանիզմ կմշակվի, միևնույնն է, վստահեցնում եմ՝ ճգնաժամը լուծվելու է: Բայց բացառում ենք ամեն տեսակի ճնշում և բռնություն: Մեր վստահությունը գալիս է նրանից, որ մենք գիտենք՝ կա մի մարդ, մի մարմին, որ գործում է պետության շահերին դեմ և չի ներկայացնում Հայաստանի Սահմանադրությունը, չի ներկայացնում հայ ժողովրդին: Մեր անմիջական պարտականությունն է ՀՀ-ում մաքրել բոլոր ինստիտուտները, որտեղ կա կոռուպցիա, կա կեղծիք, խախտում: Մեզ դրա համար են ընտրել, դրա համար են լիազորել»:
Ալեն Սիմոնյանը հանդես եկավ հայտարարությամբ, որի մասին բազմիցս խոսել են նաև նրա թիմակիցները. «Հրայր Թովմասյանը նշանակված է նախկին իշխանության ղեկավարի կողմից, որի մասին բառացի ասաց Թովմասյանը իր հարցազրույցի ժամանակ: Թովմասյանը նշանակվել էր, որպեսզի ապահովեր Սերժ Սարգսյանի գոյությունը: Այդքանից հետո ինչպես կարող են վստահելի լինել ՍԴ-ի որոշումները: Թովմասյանը միշտ եղել է ՀՀԿ-ի անդամ և քաղաքական գործիչ: Սա անընդունելի է»: