Պուտինը խոստացել էր հաշվի առնել Ղամիշլիում ապրող հայերի անվտանգությունը և կատարել է իր խոստումը․ Փաշինյան
ՔաղաքականՀՀ վարչապետ Նիկոլ Փաշինյանը հարցազրույց է տվել Коммерсантъ-ի հատուկ թղթակից Վլադիմիր Սոլովյովին՝ անդրադառնալով ԵԱՏՄ-ի և Սերբիայի միջև ազատ առևտրի գոտու մասին համաձայնագրի ստորագրմանը, սիրիահայերի պաշտպանությանը և այլ թեմաների:
Անդրադառնալով Սիրիայում բնակվող հայերի անվտանգության հարցին՝ ռուս-թուրքական պայմանավորվածությունների ֆոնին, Փաշինյանը նշել է. «Ես այդ առիթով խոսել եմ Ռուսաստանի նախագահի հետ։ Մենք անհանգստություն ունեինք, եւ ես խնդրեցի Ռուսաստանի նախագահին հնարավոր ամեն բան անել, որպեսզի հաշվի առնվեն հայերի շահերը կոնկրետ Ղամիշլիում։ Այն ժամանակ այնտեղ լարվածությունը շատ բարձր էր՝ կապված Թուրքիայի ներխուժման հետ։ Ուզում եմ շնորհակալություն հայտնել Վլադիմիր Վլադիմիրի Պուտինին այն բանի համար, որ արդյունքում այդ հատվածում ապրող հայերի անվտանգային շահերը հաշվի առնվեցին։ Մենք հուսով ենք, որ պայմանավորվածությունները, որոնք ձեռք են բերվել, կյանքի կկոչվեն եւ հայերի անվտանգային շահերը կշարունակեն պահպանվել»։
Այն հարցին, թե նրանց անվտանգությունը արդյոք կապահովեն ռուս կամ ռուս ու թուրք զինվորականները միասին, Փաշինյանը պատասխանեց, որ Սիրիայում Ռուսաստանը զգալի ներկայություն ունի։ «Նրա դերը անվտանգության ապահովման մեջ բավական բարձր է։ Մենք շատ ուրախ ենք, որ այնտեղ նման մարդասիրական առաքելություն ենք իրականացնում»,- նշել է նա՝ հավելելով, որ դա Հայաստանի համար շատ կարեւոր առաքելություն է․ «Ես այն պատմական եմ համարում։ Այն հաջողությամբ կյանքի է կոչվում եւ շարունակվում է։
Հստակեցնող այն հարցին, թե արդյոք Պուտինն իրեն խոստացե՞լ է, որ Ռուսաստանը երաշխավորում է սիրիահայերի անվտանգությունը, եւ ինչպե՞ս է դա ձեւակերպվել․ Փաշինյանը պատասխանել է․ «Ռուսաստանի նախագահը խոստացել է եւ կատարել է իր խոստումը։ Նա ասել է, որ բանակցությունների ընթացքում հաշվի կառնվեն նաեւ Ղամիշլիի հայերի շահերը։ Ես տեղեկացրել եմ նրան, որ այնտեղ հայկական մեծ համայնք կա։ Մենք տեսնում ենք, որ այդ խոսակցությունը կոնկրետ դրական հետեւանքներ ունի»։