Թանկացումներն անխուսափելի են, տավարի միսն արդեն իսկ թանկացել է
ՀասարակությունԱզգային ժողովում 2020 թվականի բյուջեի քննարկման ժամանակ ՀՀ վարչապետ Նիկոլ Փաշինյանը նշեց, որ Հայաստանում տնտեսական գործընթացներում դրական միտումները պահպանվում են: Նա հատուկ նշեց, որ 2019-ի առաջին 10 ամսվա տվյալներով 7.1 տոկոս տնտեսական ակտիվության ցուցանիշ է գրանցվել: Սակայն գյուղատնտեսական արտադրանքի ծավալը կազմել է 95.2 տոկոս, այսինքն՝ 4.8 տոկոս նվազում է գրանցվել: Թեմայի շուրջ ԼՈՒՐԵՐ.com-ի թղթակիցը զրուցեց «Ագրարագյուղացիական միավորում» հասարակական կազմակերպության նախագահ Հրաչ Բերբերյանի հետ:
«Մեր հաշվարկներով անկումը ավելի շատ է: Բայց եթե նույնիսկ 4,8 տոկոս նվազումը հաշվի առնենք, միևնույն է լուրջ թիվ է մեր տնտեսության համար: Խոսքը միլիարդավոր դրամների մասին է: Մի քանի ծրագրեր կան, որոնք վարչապետը ճիշտ է անում, ընտրել է ճիշտ ուղղություններ, բայց կարևորը հետևողական լինելն է, որպեսզի արդյունքները նկատելի լինեն»,- ասաց Բերբերյանը:
Նրա խոսքով՝ ծրագրեր գրողները միշտ չէ, որ փորձառու են, ավելին՝ երբեմն տգետ են. «Ես կարծում եմ, որ վարչապետը լուրջ կադրային փոփոխությունների կարիք ունի»:
«Տնտեսական 7 տոկոս աճը միջին ցուցանիշ է: Իհարկե, դրական ցուցանիշ է, բայց ինչ է կատարվում իրականում. օրինակ՝ խոշոր եղջերավոր անասունների միսը թանկացել է: Ամենայն հավանականությամբ Նոր տարվա նախաշեմին նորից կթանկան: Իմ կարծիքով՝ նաև գարնանը կլինեն թանկացումներ, քանի որ այս տարի անասնակերը թանկ է եղել: Ինչպես գիտենք՝ սրանք շղթայական են»,- ասաց Բերբերյանը՝ նշելով, որ իրենք պատրաստ են համագործակցել կառավարության հետ, կիսվել փորձով. «Այսպես, թե այնպես, մենք աշխատում ենք, իրականացնում ծրագրեր, գիտենք մեր գործը: Մենք փորձ ունենք»: