«Չերեզ Աշտարակ Մոսկվա է գնացել». ո՞ւր է եղել վարչապետը (լուսանկարներ)
ՀասարակությունԻնչպես հայտնի է այսօր Արցախում՝ Շուշիում, տեղի ունեցավ Ազգային անվտանգության խորհրդի քարտուղար Արմեն Գրիգորյանի հարսանիքը: Վերջինիս կինը դարձավ «Իմ քայլը» խմբակցության պատգամավոր Սոս Ավետիսյանի քույրը: Բնական է՝ հարսանիքին ներկա էր իշխանական, քաղաքական ողջ էլիտան՝ ինչպես Արցախից, այնպես էլ Հայաստանից:
Նկատի ունենալով այս հանգամանքը, կարելի էր կռահել, թե ուր էր գնում վարչապետ Նիկոլ Փաշինյանը, երբ փոքրիկ դստեր՝ Արփիի հետ լուսանկար էր հրապարակել և կից գրել. «Գնում ենք Արցախ»:
Ավելի ուշ վարչապետի մեծ դուստրը՝ Մարիամ Փաշինյանը լուսանկար էր հրապարակել Արցախում ծառայող եղբոր հետ, ինչը նշանակում է, որ Փաշինյաններն ընտանիքով Արցախ այցելելու և Աշոտ Փաշինյանին տեսնելու առիթը բաց չեն թողնում:
Այն մասին, որ Փաշինյանը երկրի ղեկին նստելուց հետո նախկինների ավանդույթներն է շարունակում, բազմիցս է խոսվել: Իսկ պետական ուղղաթիռով ոչ թե գործուղման, այլ դրանից անձնական նպատակներով օգտվելու վերաբերյալ պատասխաններում՝ վարչապետն իրեն արդարացնող մի պատճառ մշտապես գտել է:
Չնայած հերթական քննադատություններին՝ վարչապետը շտապեց ճանապարհին կատարված միջադեպի պատմությամբ ակնարկել, որ Արցախ մեկնել է ոչ թե ուղղաթիռով, այլ՝ մեքենայով:
Սակայն սրանով քննարկումների շրջանակը վարչապետն էլ ավելի լայնացրեց. «որտե՞ղ է ուզում մեզ խաբած լինել վարչապետը»: Համացանցում սկսեցին հրապարակել Արցախի քարտեզը՝ ասելով, թե վարչապետը «չերեզ Աշտարակ Մոսկվա է գնացել»: Բանն այն է, որ Երևանից-Շուշի ճանապարհին Հաթերք գյուղի մոտով անցնելու համար Փաշինյանը ստիպված պետք է լիներ ճանապարհից շեղվել մոտ 10-15 կմ: Պատմությունը ոմանք թերահավատորեն են ընդունել և կասկածներ կան, որ վարչապետն Արցախ ամենևին էլ մեքենայով չի գնացել:
Հիշեցնենք՝ ոչ վաղ անցյալում Փաշինյանն անդրադարձել էր իր՝ ուղղաթիռով տեղաշարժվելուն, ինչը սոցիալական ցանցերում պարբերաբար թեժ քննարկումների թեմա է դառնում: «Վարչապետի ծառայողական ուղղաթիռն ունի պարտադիր թռիչքային ժամեր։ Սա նշանակում է, որ ջարդոնի չվերածվելու համար այդ ուղղաթիռը պարտավոր է դատարկ էլ օդ բարձրանալ, գնալ Ստեփանակերտով, Վարդենիսով պտտվել-գալ, անգամ եթե վարչապետը նրա մեջ չէ, որովհետեւ իր տեխնիկական կանոնակարգի մեջ գոյություն ունեն պարտադիր թռիչքային ժամեր, և եթե չթռչի, կդառնա մետաղի ջարդոն, կստացվի, որ մենք փչացրել ենք պետական գույքը»,- ասել էր Նիկոլ Փաշինյանը:
Սակայն վերջինս հաշվի չէր առել այն հանգամանքը, որ դեպի Ստեփանակերտ թռիչքի համար ծախսվող 1 մլն 102 հազար դրամը պետական բյուջեից աննպատակ ծախսելը պետական գույքը ոչնչացնելու պես մի բան է:
Ինչ վերաբերում է ուղղաթիռի թռիչքների պարբերականությանը՝ կառավարությունից տեղեկացրել էին. «Տեխնիկական անհրաժեշտությունից ելնելով, ոչ ուշ քան յուրաքանչյուր 22-րդ օրը` նախորդ թռիչքի կատարման օրվանից, իրականացվում է ստուգողական թռիչք»:
Նշենք նաև, որ Փաշինյանը Հովհաննես Թումանյանի 150-ամյակի միջոցառմանը մասնակցելու համար Դսեղ էր մեկնել ուղղաթիռով: Ինչպես վարչապետի մամուլի խոսնակն էր նշել. «Ժամանակը տնտեսելու, ավելի արագ հասնելու համար»: Իսկ ուղղաթիռով Իջևան՝ ընկերոջ ծննդյան տարեձարձին գնալու լուրը վարչապետը հերքել էր. «Ընդհանրապես ուղղաթիռը ճոխություն չէ, այլ փոխադրամիջոց, բայց Սևանից Դիլիջան ընտանեկան միջոցառման, իսկ Դիլիջանից Իջևան ընկերոջ տարեդարձին ուղղաթիռով մեկնելը տրամաբանական չէր լինի»,- նշել էր նա: