3-4 տարուց շուտ փոփոխություններ ակնկալել պետք չէ. սպասվում է կայանատեղիների թանկացում
Փոխվարչապետ Տիգրան Ավինյանի խորհրդական Ավետիք Էլոյանը Հ1-ի եթերում հայտարարել էր, որ Երևանի քաղաքապետարանի հետ մշակում են տրանսպորտային համակարգը բարելավող՝ 150 մլն դոլարանոց փաթեթ։ Նոր փոփոխություններն ուղեկցվելու են կայանատեղիների գնի թանկացմամբ, տեղ-տեղ նաև դրանց համար վճարի վերացմամբ:
«Խոսքը միայն հանրային տրանսպորտի մասին չէ, այլ ընդհանուր դաշտի բարելավման: Այս փաթեթի սահմանում կլինեն նաև օրենսդրական փոփոխություններ, և գուցե լավ նորություն չէ, բայց պետք է ավտոկայանատեղիի գինը բարձրանա, այլապես մենք շարունակելու ենք նույն ճանապարհով»,- ասել էր Էլոյանը:
ԼՈՒՐԵՐ․com-ի հետ զրույցում «Վարորդի ընկեր» հասարակական կազմակերպության համահիմնադիր Սերգեյ Ղահրամանյանը նկատեց, որ Էլոյանի խոսքում նորություն չկար, ասաց այն, ինչ վերջին 2 տարիներին ակտուալ է Երևան քաղաքի համար։
«Հանրային տրանսպորտի ներդրման պրոցեսները սկսել են նախորդ իշխանության ժամանակվանից։ Այն երկրները, որոնք երթևեկության տեսանկյունից բարձր մակարդակ ունեն, այդտեղ կայանատեղին բարձր գին արժի։ Դա զուգահեռ է տեղի ունենում․ գները բարձրանում են, հանրային տրանսպորտը ներդրվում է։ Դրանից լուրջ փոփոխություններ չեն լինում։ Երբ լինի իրական, արժանապատիվ հանրային տրանսպորտ, մարդիկ կօգտվեն, վարորդները կսկսեն իրենց մեքենաները թողնել տնակներում, կօգտվեն հանրային տրանսպորտից, այդ ժամանակ մենք կկարողանանք ասել, որ ունենք հանրային տրանսպորտ։ Այդ ժամանակ տաքսու նկատմամբ պահանջարկը կիջնի, բնականաբար կայանատեղիների պահանջարկը ինչ-որ ձևով կպակասի, բայց դա չի նշանակում, որ չպետք է արժևորել համայնքի գույքը։ Կլինեն մարդիկ, ովքեր կուզենան մեքենան կայանել իրենց աշխատավայրի մոտ, դա ինչ-որ գումար կարժենա և դրա հետ մեկտեղ այդ գումարները կբարձրանան»,- ասաց Ղահրամանյանը։
Նրա խոսքով՝ ներկայումս կարմիր գծեր ասվածից ոչինչ չի փոխվում, ընդամենը փողոցում գույն են շաղ տվել․ «Այն, որ իրավակարգավորումը թերի է կամ գոյություն էլ չունի, դա ապացուցված է։ Ով վճարում է, վճարում է, ով չի վճարում միանշանակ օրենքի դաշտում են գործում, այնպես չի, որ դա օրինազանցություն է, որովհետև դատական գործընթացներում 99 % դեպքերում քաղաքացին ճիշտ է լինում»,- նշեց նա։
Երևանի քաղաքապետարանի մամուլի խոսնակ Հակոբ Կարապետյանը թեմայի վերաբերյալ գրառում է կատարել՝ նշելով․ «Երևանում ավտոկայանատեղերի կազմակերպման որևէ փոփոխություն տեղի է ունենալու տրանսպորտային ռեֆորմի իրականացմանը զուգահեռ կամ իրականացումից հետո»:
Ղահրամանյանից հետաքրքրվեցինք՝ ե՞րբ են տեղի ունենալու փոփոխությունները, ի պատասխան ասաց․ «Թեև իրենք նշում են 2 տարի, սակայն ես դա վաղաժամ եմ համարում։ Ես կարծում եմ 3-4 տարի հետո, ավելի շուտ այդ ամենը կյանքի կոչել հնարավոր չէ: Պետք է արդեն սկսեն հստակեցնել այն կանգառները, կանգառատեղիները հստակեցնել, որ երբ տրանսպորտային միջոցները երբ լինեն, միանգամից ներդրվեն երթևեկության մեջ և չսպասեն՝ լինի տրանսպորտը, նոր այդ ամենը իրագործեն»,- նշեց «Վարորդի ընկեր» հասարակական կազմակերպության համահիմնադիրը:
Սոնա Հարությունյան