Զելենսկին «հին ուկրաինական ավանդույթ» է համարել Յուլյա Տիմոշենկոյի ընդդիմադիր դառնալը
Արտաքին ՔաղաքականՈւկրաինայի նախագահ Վլադիմիր Զելենսկին հայտարարել է, թե «Բատկիվշչինա» կուսակցության առաջնորդ Յուլյա Տիմոշենկոն ընդդիմության է անցել սեփական շահի նկատառումներով, այլ ոչ թե սկզբունքային դրդապատճառներով: Նոյեմբերի 19-ին այդ մասին պետության ղեկավարը գրել է իր տելեգրամ-ալիքում:
«Մի շատ վաղեմի ուկրաինական ավանդույթ կա: Հինգ տարին մեկ Յուլյա Վլադիմիրովնա Տիմոշենկոն գործող նախագահի նկատմամբ ընդդիմություն է դառնում՝ հոգատարություն նմանակելով ժողովրդի մասին»,- հեգնում Է Զելենսկին:
Նա մեկնաբանել է Տիմոշենկոյի հայտարարությունները, որոնք նա նոյեմբերի 18-ին արել է ICTV հեռուստաալիքի «Խոսքի ազատություն» հաղորդման ժամանակ: Իր ելույթում Տիմոշենկոն պատմել է, որ ինքը Զելենսկուն առաջարկել է թեկնածություններ որոշակի պաշտոնների, մասնավորապես, Պետական հացահատիկա-պարենային կորպորացիայի ղեկավարի պաշտոնում նշանակման համար:
Ինչպես պնդում է Զելենսկին, Տիմոշենկոն հասկանալ է տվել, որ մի շարք պաշտոնների իր առաջարկած մարդկանց նշանակումը եղել է այն պայմանը, որի դեպքում նրա կուսակցության խմբակցությունը պատրաստ կլիներ խորհրդարանում քվեարկելու այն օրինագծերի օգտին, որոնք կառաջարկվեին նախագահի եւ նրա «Ժողովրդի ծառա» կուսակցության կողմից: «Այո՛, Յուլյա Վլադիմիրովնան իրոք առաջարկեց,- շարունակել է Զելենսկին:- Նա բերել էր իր մարդկանց ցուցակը «համեղ» տեղերի նշանակման համար: Իսկ փոխարենը խոստանում էր մեկ տարվա ընթացքում Գերագույն ռադայում «Ժողովրդի ծառայի» հետ քվեարկել բոլոր օրենքների օգտին: Անշուշտ, մենք մերժեցինք: Չէ որ նախապայմանավորվածությունների դարաշարջանն ընդմիշտ ավարտվել է»:
«Բայց նայեք, այժմ ի՜նչ գեղեցիկ տեսք ունի «ընդդիմությունը»: Այդպիսի՜ դեմք: Իսկ գիտե՞ք, ինչու: Որովհետեւ այժմ պարզապես «համեղ պատառ» չեն տալիս նրան»,- հավելել է Ուկրաինայի նախագահը, հաղորդել է ՏԱՍՍ-ը: