Ո՞ւր են նայում ջրային ոլորտի պատասխանատուները
ՀասարակությունԳաղտնիք չէ, որ ՋՕԸ-երը, որոնք կոչված են կարգավորելու հողերի ոռոգման աշխատանքները, իսկական չարիք են դարձել գյուղատնտեսությամբ զբաղվող հողագործների համար:
Արարատի մարզում հսկայական տարածքներ կան, որոնք տարիներով մնում են անջրդի միայն այն պատճառով, որ պատկան մարմիններն անտեսում են ոռոգման ջուր հատկացնելու գյուղացիների խնդրանքը: Այս անգամ խոսքը վերաբերում է Արարատի մարզի Վերին Արտաշատի զորամասի մոտ գտնվող մոտ 60 հեկտար հսկայական տարածքին:
Բնակիչների խոսքով՝ դիմել են ջրային տնտեսությանը, դիմել են ՋՕԸ-ին, խնդրել են մոտակայքում գտնվող Դվինի ջրանցքի վրա մի կետ ավելացնել և ջուր տալ այդ տարածքին, սակայն իրենց խնդրանքն անպատասխան է մնացել: Փոխարենը, Դվինի ջրերից օգտվում են արտոնյալները, նրանք, ովքեր թե՛ նախկին, թե՛ ներկա իշխանությոնների օրոք ուզած ժամանակ կարող են ոռոգել իրենց հողերը և դրա դիմաց կարող են նույնիսկ չվճարել: Նախկինում բերրի հողերը հիմա ամայի են դարձել ու տատասկապատ։
«Կարելի է նաև ուղտ պահել»,- ասում են բնակիչները և հավելում. «Ձմեռամուտին ենք ահազանգում, որ գոնե մինչև գարուն այս հարցը կարգավորվի: Մենք էս պետությունից ոչինչ չենք ուզում, ուղղակի ուզում ենք աշխատել մեր հողի վրա, մեր քրտինքով հաց վաստակել ու շենացնել մեր երկիրը»:
Իսկ թե ինչո՞ւ են պատկան մարմիններն անտեսում բնակիչների խնդրանքը, թե ինչո՞ւ ոչ ոք չի մտահոգվում հողին ջրանցքից ջուր հասցնելու աշխատող հողագործների առաջարկով, դժվար է ասել: Մնում է արձանագրել, որ ջրային ոլորտի պատասխանատուներն, ինչպես շատ դեպքերում, այնպես էլ այս, ուրիշ կողմ են թեքել հայացքը: