Նպաստից զրկված տարեց քույրերի դեպքով ևս մեկ գնահատում կանցկացվի․ նախարարություն
ՀասարակությունՎանաձորում բնակվող տարեց քույրերին նպաստից զրկելու դեպքը ուսումնասիրվում է: Այս մասին ԼՈՒՐԵՐ․com-ի հետ զրույցում ասաց Աշխատանքի և սոցիալական հարցերի նախարարի մամուլի քարտուղար Սոնա Մարտիրոսյանը։
«Նախարարը հանձնարարել է զբաղվել կանանց դեպքով և ևս մեկ գնահատում անցկացնել։ Գնահատող իրականացնող և նպաստ նշանակող մարմինը նախարարությունը չէ, դրանք համայնքային ծառայություններն են։ Նախարարը հանձնարարել է կապ հաստատել համայնքային ծառայությունների հետ, փորձել հասկանալ՝ գնահատման արդյունքներով ինչ է պարզվել և ևս մեկ գնահատում իրականացնել՝ պարզելու` սխալմունք եղել է, թե ոչ։ Այս պահին ոչինչ չենք կարող ասել, քանի որ գնահատումը մեկ օրում անցկացնել չի լինում»,- ասաց Մարտիրոսյանը։
Նա նշեց՝ դեպքը գտնվում է նախարարության ուշադրության կենտրոնում և նախարարի հնաձնարարականով զբաղվում են դրանով։
Երեկ azatutyun.am-ը տեսանյութ էր հրապարակել, որտեղ պատմում էր նպաստից զրկված տարեց քույրերի մասին։ Բանն այն է, որ 88-ամյա Բավական Ոսկանյանը Վանաձորի իր բնակարանում ընկել, ծունկն ու կոնքոսկրը կոտրել է։ Տնակային ավանի ցուրտ ու անբարեկարգ տնակի դուռը կողպել է ու 93-ամյա քրոջ՝ Վերգինեի տուն տեղափոխվել։ Նրանք ժառանգներ չունեն, երկուսով միասին մոտ 60 000 դրամ կենսաթոշակ են ստանում։ 2014 թ․ Բավական Ոսկանյանը զրկվել էր աղքատության նպաստից` 18 000 դրամից, քանի որ սոցիալական ծառայության աշխատակիցները նկատել էին, որ հաճախ փակում է տնակի դուռն ու գիշերում քրոջ բնակարանում։
Անցած ամիս, երբ լրացել է սոցիալական ծառայություն նոր փաստաթղթեր ներկայացնելու ժամկետը, 93-ամյա կնոջ ներկայացրած տվյալները համարել են կեղծ ու նրան զրկել նպաստից․ - «Ասում ա՝ քույրդ քեզ հետ ա ապրում, եթե քիրդ առանձին ըլի, դու կստանաս: Բայց հիվանդ կնիկ ա էն մարդը, ո՞նց ես նրան բրախեմ»:
Սոցիալական ծառայությունում պարտադրում են տվյալների մեջ շեշտել, որ անկողնային վիճակում գտնվող 88-ամյա Բավական Ոսկանյանը ոչ թե իր հաշվառման վայրում՝ տնակում է ապրում, այլ քրոջ` Վերգինեի բնակարանում։ Մինչդեռ Ոսկանյան քույրերը մտավախություն ունեն, որ դուրս կմնան տնակային ավանի բնակիչների և բնակարանի կարիք ունեցողների ցուցակներից։ Աշխատանքի և սոցիալական հարցերի նախարարությունից պատասխանել են՝ պնդելով, որ մշտական բնակության վայրը փոխելիս` անձը պարտավոր է յոթնօրյա ժամկետում համապատասխան մարմիններին տեղեկացնել այդ մասին։