10-15 հոգի թափթփուկներ են եղել. պետական արձագանք` Եղեգնուտում կատարվածին
ՀասարակությունԱյսօր լուրեր տարածվեցին այն մասին, թե Արմավիրի մարզի Եղեգնուտ համայնքում չգործող երկաթբետոնե կոնստրուկցիաների գործարանի դիմաց նախկին աշխատակիցները բողոքի ակցիա են իրականացնում։
Թեմայի վերաբերյալ ԼՈՒՐԵՐ.com-ի թղթակիցը փորձեց մանրամասներ իմանալ Արմավիրի մարզպետարանից: Մարզպետ Համբարձում Մաթևոսյանը, նրա խորհրդական Նվեր Պետրոսյանը մեզ ուղղորդեցին խոսել համայնքապետի հետ, քանի որ խնդրին մանրամասն ծանոթ չէին:
Եղեգնուտ համայնքի համայնքապետի տեղակալ Աշոտ Խուրշուդյանը մեզ հետ զրույցում պատմեց. «Մեր համայնքում բողոքի ակցիա չի եղել: Սխալ լուրեր են տարածել: Տարածքի օրինական սեփականատերը թղթերը ձեռքին հարկադիր կատարողների հետ եկել է տվյալ տարածք, որ գույքագրում կատարի: Եղեգնուտի նախկին գյուղապետը հավաքել է իր եղբայրներին, կանանց, մի քանի հոգի էլ գյուղից ու գնացել են, սեփականատիրոջ մուտքը տարածք խոչընդոտել են: Քաշքշուկ է եղել մի քիչ: 10-15 հոգի թափթփուկներ են եղել, թե չէ ինչ բողոքի ակցիա»:
Նախկին գյուղապետը՝ Ռազմիկ Մարգարյանը, համայնքապետի տեղակալի պնդմամբ, պաշտոնավարման տարիներին մշտապես եղել է կոռուպցիոն գործարքների մեջ ու կեղծ փաստաթղթերի միջոցով գյուղին պատկանող բազմաթիվ տարածքներ վաճառել, օտարել կամ նվիրել է:
«Նա և եղբայրը թալանել են ամբողջ գյուղն ու այդ գործարանը: Նախկին գյուղապետն այդ տարածքը կեղծ փաստաթղթերով հատկացրել է իր եղբորը: էսօր էլ էդ եղբոր հետ դատական վճռով հաստատված իրական սեփականատիրոջը՝ Սարիբեկյան Արարատին, չեն թողնում իր օրինական գործողությունները կատարի իր սեփական տարածքում»,- նշեց Խուրշուդյանը:
Մեր այն հարցին, թե բողոքողների մեջ եղել են գործարանի նախկին աշխատակիցներ, տեղակալն ասաց՝ ո՛չ, բողոքողների մեջ ոչ մի նախկին աշխատող չի եղել: Եղել են միայն նախկին թալանչի գյուղպետի համախոհները:
«Էդ մենք պիտի իր դեմ բողոքի ակցիա անենք՝ մեր տարածքներն ապօրինի վաճառելու համար, սենց որ գնաց, կանենք»,- եզրափակեց խոսքը համայնքապետի տեղակալը: