Վիտալի Բալասանյանն առաջադրվել է նախագահի թեկնածու (տեսանյութ)
ԱրցախԱյսօր Արցախի «Արդարություն» կուսակցության արտահերթ համագումարում Արցախի հերոս Վիտալի Բալասանյանը հայտարարեց, որ համաձայնություն է տալիս առաջադրվելու և մասնակցելու 2020 թ. Արցախի նախագահական ընտրություններին:
«Ես այս քաղաքական պայքարի մեջ եմ մտնում հանուն մեր ժողովրդի համերաշխության և միասնության, հանուն արցախցու արժանապատվության: Մենք առավել կարեւորում ենք հետևյալը՝ Հայաստանը որպես Արցախի և նրա բնակչության ֆիզիկական անվտանգության երախավոր որքանո՞վ է համարժեք գնահատում և արձագանքում հայկական 2 պետություններին նետված նոր մարտահրավերներին: Արդյոք բավարար չափով են չեզոքացվում առկա սպառնալիքները: 2018-ին Հայաստանում տեղի ունեցած իշխանփոխության արդյունքում Արցախի խնդրի կարգավորման հարցում ստեղծվեց նոր իրավիճակ՝ պայմանավորված ՀՀ իշխանությունների որդեգրած նոր մոտեցումներով, սկզբունքներով, մարտավարությամբ եւ ռազմավարությամբ: ՀՀ-ում ստեղծված այս նոր իրողություններին արագ արձագանքեցին Ադրբեջանի իշխանությունները: Նրանց ռազմավարությունը մնաց նույնը՝ այն է՝ վերացնել Արցախի սուբյեկտայնությունը, տարածքը բռնակցել իրեն, իսկ տեղի բնակչության համար նախատեսել Բաքվի, Սումգայիթի, Գանձակի եւ հայկական այլ բնակավայրերի հայության ճակատագիրը, իսկ մարտավարության մեջ տեղի ունեցան փոփոխություններ»,- ասաց Բալասանյանը:
Նա նշեց, որ պատերազմող երկրի համար մեծ շռայլություն և պարտության նախապայման է առկա աշխարհաքաղաքական իրավիճակը ոչ համարժեք գնահատելը, ուստի երկրի անվտանգությունը մեծացնելու համար անհրաժեշտ հրամայական է առավել սեղմ ժամկետներում վերականգնել ժողովրդի խարխլված համերաշխությունը, վերացնել աղքատությունը, սոցիալական արդարության դեֆիցիտը, առավել արդյունավետ դարձնել տնտեսության կառավարումը:
Կարդացեք նաև` Աշոտ Ղուլյանն առաջադրվել է նախագահի թեկնածու