Հայաստանն ու Հորդանանը պատրաստ են լիարժեք իրացնել համագործակցության զարգացման չօգտագործված ներուժը. Այման Ալ Սաֆադի
ПолитическиеՀայաստանն ու Հորդանանը երկկողմ պատրաստակամ են գործնական քայլեր ձեռնարկելու տարբեր ոլորտներում համագործակցության դեռևս չօգտագործված ներուժի լիարժեք իրացման համար: Այս մասին Երևանում Հորդանանի Հաշիմյան Թագավորության արտաքին գործերի և արտագաղթյալների նախարար Այման Ալ Սաֆադի հետ համատեղ ասուլիսում վստահեցրեց ՀՀ արտաքին գործերի նախարար Զոհրաբ Մնացականյանը:
«Մենք լավատես ենք հայ-հորդանանյան քաղաքական ու տնտեսական հարաբերություններին նոր մակարդակ հաղորդելու հարցում: Իհարկե, առկա է տարբեր ոլորտներում համագործակցության առավել զարգացման և հարստացման դեռևս չօգտագործված ներուժ: Սակայն այսօր վստահությամբ կարող եմ նշել, որ առկա է երկկողմ պատրաստակամություն՝ գործնական քայլեր ձեռնարկելու այդ ներուժի լիարժեք իրացման ուղղությամբ»,-ասաց Մնացականյանն ու նախարարի հետ հանդիպման ընթացքում ձեռք բերված պայմանավորվածություններն ու ուրվագծած հեռանկարները համարեց դրա վառ վկայությունը:
Նախարարները բավականին ընդարձակ քննարկում են ունեցել թե երկկողմ, թե բազմակողմ շրջանակներում, թե ինչպես կարող են ամրապնդել ու խորացնել համագործակցությունը համապատասխան ոլորտներում: Մնացականյանը նշեց՝ կան բավական հետաքրքիր հեռանկարներ՝ և բարձր տեխնոլոգիաների, և ագրոբիզնեսի, և տուրիզմի, դեղագործության և այլ բնագավառներում, որտեղ իրապես հնարավոր է անել շատ գործնական քայլեր: «Եվ մենք այսօր կարողացանք ուրվագծել այն, ինչ մեզնից է կախված՝ ստեղծել հարթակներ, որտեղ մեր գործարար շրջանակները կկարողանան շատ ավելի կոնկրետ համաձայնությունների գալ: Եվ այդ հեռանկարները չափազանց երևելի են»,-ասաց նախարարը:
Մնացականյանը կարևոր համարեց նաև Երևանի և Ամանի միջև ուղիղ թռիչքների հաստատումը: Նախարարի կարծիքով՝ դա կնպաստի երկկողմ հարաբերությունների սերտացմանը: «Այս հարցով ևս ունեցանք որոշ քննարկումներ և կփորձենք մեր կողմից անել հնարավորը, որ իրականացնենք դա: Դա կնպաստի տուրիզմի զարգացմանը»,-նշեց Մնացականյանը:
Նախարարները քննարկել են նաև միջազգային հարաբերությունների և տարածաշրջանային անվտանգության հարցերի լայն շրջանակ: Զոհրաբ Մնացականյանը ներկայացրել է նաև Լեռնային Ղարաբաղի հիմնախնդրի կարգավորման գործընթացում Հայաստանի սկզբունքային դիրքորոշումն ու մոտեցումները՝ ընդգծելով խաղաղությանը նպաստող միջավայրի ձևավորման և ժողովուրդներին խաղաղության նախապատրաստելու պայմանավորվածությունների իրականացման կարևորությունը: Մնացականյանը վստահ է, որ այս այցը երկկողմ հարաբերություններում նոր էջ կբացի:
Հորդանանի Հաշիմյան Թագավորության արտաքին գործերի և արտագաղթյալների նախարար Այման Ալ Սաֆադին Հայաստանի հետ համագործակցության զարգացման համար զբոսաշրջությունը համարում է անկյունաքարային ուղղություն: « Մենք բավականին համեստ առևտուր ու տնտեսական գործունեություն ենք ծավալում միմյանց հետ: Մենք փորձեցինք գործնական կերպով գտնել այն ասպարեզները, որտեղ համագործակցությունը կարող ենք առաջ տանել: Զբոսաշրջությունը անկյունաքարային այդպիսի ուղղություններից մեկն է »,-ասաց Այման Ալ Սաֆադին:
Նա առևտուրը, դեղագործությունը, տեղեկատվական հաղորդակցության տեխնոլոգիաների ոլորտը համարեց ասպարեզներ, որտեղ Հայաստանն ու Հորդանանը կարող են համագործակցել՝ գործնական քայլեր կատարել՝ տնտեսական համագործակցության ծավալներն աճեցնելու համար: Նախարարը նաև նշեց՝ շատ հպարտ են, որ շատ կենսունակ հայկական համայնք ունեն Հորդանանում:
« Մենք պետք է համապատասխան նախապատրաստական աշխատանք կատարեք, որպեսզի մեր հարաբերությունները հետայսու առաջ տանենք: Շատ հաջող հանդիպում էր, խոստումնալից ներուժ կա: Երկուսս էլ հաստատակամ ենք առաջ տանել հարաբերությունները: Մենք երկրներ ենք, որոնք շատ նմանություններ ունեն, պատրաստակամ են ընթանալ ուղիով, որը տանում է դեպի փոխադարձ շահավետ համագործակցություն »,- ասաց Այման Ալ Սաֆադին: