Ի՞նչ փակ տեղեկատվություն է տրվել սորոսականներին. շրջադարձ Բրատիսլավայից հետո
ՎերլուծականԴանիել Իոաննիսյանն իր ֆեյսբուքյան էջում գրում է. «Լրագրողների համար Արցախյան հակամարտության թեմայով փակ քննարկում էինք կազմակերպել, որի ժամանակ շատ բաց ու անմիջական քննարկումներ եղան ԱԳ նախարար Զոհրաբ Մնացականյանի և ԱԽ քարտուղար Արմեն Գրիգորյանի հետ: Չհրապարակելու պայմանով՝ լրագրողները բազմաթիվ մանրամասներ իմացան արտաքին քաղաքականության տրամաբանության փոփոխությունից, անվտանգության հետ կապված որոշումների կայացման տրամաբանությունից և Արցախյան կարգավորման նուրբ մանրամասներից: Բնականաբար չեմ կարող պատմել, թե ինչ ենք քննարկել, բայց կարող եմ վստահաբար պնդել, որ չկա ավելի մեծ սուտ, քան «այս իշխանությունը Արցախում հող է հանձնում» թեզը և ավելի մեծ ցինիզմ, քան մասնավորապես ՀՀԿ-ականների կողմից այդ թեզի շրջանառումը»:
Ուշագրավը թերևս այն է, որ հեղափոխության օրերին Նիկոլ Փաշինյանն առիթը բաց չէր թողնում հայտարարելու համար, որ ժողովուրդը մշտապես տեղյակ է լինելու Արցախի հարցում իշխանությունների կատարած յուրաքանչուր քայլից: Սակայն, ժողովուրդը որպես այդպիսին արդեն մեկ տարի է ինչ դուրս է մղված բանակցային գործընթացին ծանոթ շրջանակներից: Փոխարենը փակ և գաղտնի տեղեկություն են ստանում, այսպես կոչված, «սորոսականները»:
Ինչո՞ւ:
Ընդ որում, չմոռանանք, որ այդ նույն «սորոսականները» մինչև Բրատիսլավայում կայացած հանդիպումը քննադատում էին Փաշինյանի արցախյան գիծը, իսկ այսօր արդեն հավաստիացնում են, որ հողեր հանձնելու նպատակ Փաշինյանի իշխանությունը չունի: Մինչդեռ հենց «սորոսականներն» էին ամիսներ առաջ ակտիվորեն լոբբինգ անում, այսպես կոչված, Բոլթոնի պլանը, որը ենթադրում էր հենց փող՝ տարածքների դիմաց բանաձևի կիրարկումը:
Եթե դրան գումարում ենք ԱԱԾ նախկին պետ Արթուր Վանեցյանի վերջին մեսիջները առ այն, որ «սորոսականները» ունեն ընդգծված մոտեցում Արցախյան բանակցությունների հանդեպ և այդ մոտեցումը սպառնալիք է ազգային անվտանգությանը, եթե վերհիշենք Արցախի ԱԽՔ նախկին ղեկավար Վիտալի Բալասանյանի հայտարարությունները, որ Փաշինյանը հստակ պատվեր է կատարում Արցախի հարցում, իսկ «սորոսականները» նրան օգնում են, ապա այս ֆոնին ավելի քան տարակուսելի է ոչ միայն ԱԳՆ և ՀՀ ԱԽՔ ղեկավարների հետ կայացած հանդիպման փաստը, այլ նաև հանդիպումից հետո արված հավաստիացումները: Ստացվում է, որ Բրատիսլավայում տապալելով Լավրովի պլանը, Փաշինյանը այժմ նոր ռևերանսների է փորձում գնալ, դիմելով արևմուտքի օգնությանը և հենց այդ նպատակով էլ գործին լծվում են «սորոսական» կառույցները…