Ինձ քաղաքական որևէ գործընթաց չի գրավում. Ստյոպա Սաֆարյան
ՔաղաքականՀանրային խորհրդում սկսվել են հանդիպումներն ու քննարկումները՝ աշխատանքային ծրագրերը հստակեցնելու համար: Խորհրդի նախագահ Ստյոպա Սաֆարյանը հանդիպումներ կունենա իր գործընկերների և վարչապետի հետ՝ մի շարք հարցերի լուծումներ տալու նպատակով, որոնց մեջ կլինեն իրենց նստավայրի, Հանրային խորհրդի կիրառելի գործիքների և ծրագրի հարցերը: Ի տարբերություն նախորդ տասը տարիների՝ այս տարի Հանրային խորհրդի նիստերի համար կնշանակվեն կոնկրետ օրեր:
Ստյոպա Սաֆարյանն այսօր լրագրողների հետ հանդիպման ընթացքում խոսեց Հանրային խորհրդի առաջիկա անելիքների մասին: Նա նշեց, որ Հանրային խորհրդի մի քանի անդամների կարգավիճակ դեռ անորոշ է մնում:
«Ունենք գործընկերներ, ովքեր նշանակված լինելով, ամիսներ շարունակ չեն եկել և չեն մասնակցել խորհրդի աշխատանքներին: Նրանց հետագա գործունեությունը դեռ պետք է հասկանանք: Նշեց նաև, որ կան հարյուրավոր նոր դիմումներ՝ խորհրդին անդամակցելու համար»:
Անդրադառնալով խորհրդից հեռացող գործընկերներին՝ ասաց, որ դիմում ստացել է երկուսից միայն Հարություն Մեսրոբյանից և Լարիսա Ալավերդյանից, իսկ Արկադի Տեր-Թադևոսյանը իր՝ Հանրային խորհրդի կազմից դուրս գալու մասին հայտարարել է միայն բանավոր կերպով:
«Դիմում չի եղել դեռ: Ես պատրաստվում եմ խոսել իր հետ այս թեմայով, բայց կա տպավորություն, որ ինքն իրեն այս կառույցում չի գտնում: Եթե իր որոշումը վերջնական է, ապա մնում է իրեն բարի ճանապարհ մաղթել ու համագործակցել արդեն կառույցից դուրս»:
Լրագրողի այն հարցին, թե որքանով է Հանրային խորհուրդն ու նախագահը ցուցաբերում քաղաքական չեզոքություն, Սաֆարյանը պատասխանեց՝ «Ես չեմ անդամակցում որևէ կուսակցության, Հանրային խորհուրդ ներգրավվել եմ որպես փորձագետ, դա կարող եք տեսնել նաև իմ նշանակման հրամանագրում: Ես քաղաքագետ եմ ու պիտի պահպանեմ մասնագիտական չեզոքություն, դա ինձ համար շատ կարևոր է: Ինձ քաղաքական որևէ գործընթաց չի գրավում: Նախ ես ինձ, ապա նաև գործընկերներս թույլ չեն տա խախտել չեզոքությունը: