Այն, ինչ մենք արել ենք, ամբողջապես օրենքի տառին համապատասխան է. Գևորգ Պապոյան
ՔաղաքականՀՀ ազգային ժողովի «Իմ քայլը» խմբակցության պատգամավոր Գևորգ Պապոյանը վստահեցնում է, որ հանրաքվե անցկացնելու ԱԺ որոշումը ոչ միայն իրավական է, այլ նաև, եթե այդպես չարվեր, ապա այդ դեպքում իրավական, բարոյական և այլ խնդիրներ կառաջանային: Պատգամավորը նման տեսակետ հայտնեց ԱԺ-ում հայտարարությունների ժամանակ` կարծիք հայտնելով հնչող այն տեսակետի մասին, թե ԱԺ-ն չէր կարող հանրաքվե անցկացնելու մասին որոշում ընդունել:
«Ես չեմ ուզում իրավական մանրուքների մեջ մտնել, այն, ինչ մենք արել ենք, ամբողջապես օրենքի տառին համապատասխան է: Ես ուզում եմ խոսել այն տրամաբանության մասին, որի շուրջ այն մարդիկ ելույթներ են ունենում: ՀՀ քաղաքացիները, ժողովուրդը, սահմանադիրը կարող է որոշել, որ ուզում է սահմանադրության մեջ փոփոխություն կատարել, և 7 կամ 9 հոգի ասում են` ոչ, դու պետք է ապրես այն սահմանադրությամբ, ինչը մենք արդեն որոշել ենք ձեզ համար: Ես կարծում եմ, որ այդպես չի կարող լինել: Եվ իշխանության իրական կրողը` ժողովուրդը, որը նաև սահմանադիրն է, ցանկացած ժամանակ իր որոշմամբ կարող է սահմանադրության մեջ փոփոխություն մտցնել, կարող է նույնիսկ որոշել, որ իրեն նոր սահմանադրություն է պետք: Եվ որևէ 7 կամ 9 հոգի չի կարող ժողովրդի այդ կամքին ընդդիմանալ»,-ասաց Պապոյանը:
Նա հիշեցրեց վարչապետի խոսքերը` ժողովուրդը չէ սահմանադրության համար, այլ սահմանադրությունն է ժողովրդի համար: «Ոչ միայն իրավական առումով մենք այստեղ խնդիր չունենք, այլ հակառակ պարագայում կունենայինք իրավական տրամաբանական ժողովրդավարական և բարոյական խնդիր, եթե այս կերպ չշարունակեինք և հակառակ գործընթացն ունենայինք»,-նշեց պատգամավորը:
Սահմանադրության փոփոխությունների հանրաքվեով առաջարկվում է դադարեցնել Սահմանադրական դատարանի նախագահ Հրայր Թովմասյանի և դատարանի 6 անդամների պաշտոնավարումը: Սահմանադրության փոփոխությունների հանրաքվեն տեղի կունենա ապրիլի 5-ին: ՀՀ ազգային ժողովի «Իմ քայլը» խմբակցությունը Սահմանադրության փոփոխությունների նախագծով առաջարկում էր դադարեցնել Սահմանադրական դատարանի նախագահի և ևս 6 անդամի պաշտոնավարումը: «Իմ քայլը» սակայն առաջին ընթերցմամբ քննարկմանը իր ներկայացրած նախագծին դեմ քվեարկեց` առաջարկելով այս հարցով անցկացնել հանրաքվե: Հանրաքվե անցկացնելու որոշումն ԱԺ նիստում ընդունվել էր «Իմ քայլը» խմբակցության անդամների կողմ ձայներով: