Եղվարդի ծննդատունը կգործի. մարզպետը վստահեցնում է (տեսանյութ)
ՏեսանյութերԿոտայքի մարզպետ Ռոմանոս Պետրոսյանը լրագրողների հետ հանդիպմանն անդրադարձավ մարզում տիրող իրավիճակին, նպատակներին և 2019 թվականի ձեռքբերումներին, ինչպես նաև Ծաղկաձորում տիրող իրավիճակին։
«Ծաղկաձորում կան հանգստացողներ, որոնց թիվը ավելացավ շաբաթ-կիրակի օրերին։ Տուրիստներն ու մեր քաղաքացիները բնականոն իրականացնում են իրենց հանգիստը»,- ասաց նա։
Մարզպետը ընդգծեց, որ կորոնավիրուսի պատճառով առաջին օրերին խուճապ եղել է, որը, սակայն, շատ կարճ տևեց։ Պետրոսյանն անդրադարձավ իր՝ այլ աշխատանքի անցնելու հավանականությանը՝ նշելով, որ այլ աշխատանքի առաջարկ չի ստացել և քարոզարշավի ավարտից հետո նորից վերադառնալու է մարզպետի իր աշխատանքին։
Նշենք, որ մամուլում տարածված լուրերի համաձայն՝ Պետրոսյանը փոխարինելու է Տարածքայի կառավարման և ենթակառուցվածքների նախարար Սուրեն Պապիկյանին։ Մարզպետն անդրադարձավ նաև Եղվարդի ծննդատան հնարավոր փակվելուն՝ նշելով, որ այն աշխատելու է. «Մենք մեր միջոցներով կիրականացնենք աշխատանքների մի մասը, իսկ մյուս մասի համար կփորձենք հովանավորներ գտնել։ Կիրականացնենք շինարարական աշխատանքներ նաև անհրաժեշտ սարքավորումներ ձեռք բերել»։
Մարզպետը կարծում է, որ ծննդատունը ամռան երկրորդ կեսին կաշխատի։ Անդրադառնալով պարգևավճարներին՝ նա նշեց, որ ամեն ինչ արվել է օրենքի սահմանում։ Սակայն, դժվարացավ ասել, թե որքան է կազմել իր և մարզպետարանի աշխատակիցների ընդհանուր պարգևավճարների չափը։ «Կոտայքում միշտ թեժ է։ Մեզ մոտ համարյա 40-ին հասնող դատական հայցեր կան, այդ թվում՝ իմ դեմ»,-ասաց նա։