Մի լուսանկարի պատմություն. պարզաբանում է Վանաձորի քաղաքապետը
ՀասարակությունԺամեր առաջ Ֆեյսբուք սոցիալական ցանցի օգտատերերից մեկը Վանաձոր քաղաքի մարդաշատ փողոցից լուսանկար էր հրապարակել, որն էլ բուռն քննարկումների, ինչպես նաև քննադատությունների պատճառ էր դարձել: Իրավիճակն ամբղջությամբ հասկանալու համար ԼՈՒՐԵՐ.com-ի թղթակիցը զրուցել է Վանաձորի քաղաքապետ Մամիկոն Ասլանյանի հետ:
«Ամեն օր մեր քաղաքի բարձրահարկ շենքերն ախտահանվում են, մի քանի օրը մեկ փողոցներն են ախտահանվում, իսկ վերելակներն ախտահանվում են ամեն օր, հանրային տրանսպորտը չի աշխատում, ինչպես նաև միջմարզային փոխադրումների վրա սահմանափակումներ կան՝ ստուգում են մեքենաները»,-ասաց նա:
Ասլանյանն անդրադառնալով քննարկվող լուսանկարին վերաբերող մեր հարցին, նշեց. «Ես արդեն զրուցել եմ ոստիկանապետի, նաև քաղաքացիների հետ, խնդիրն այն է, որ այսօր մարդիկ թոշակ են ստացել և դուրս են եկել գումարը բանկոմատից հանելու, նաև կենսական անհրաժեշտության գնումներ կատարելու: Լուսանկարներում ևս երևում է, որ այդ կուտակումները բանկոմատների մոտ են և դա շատ բնական է, եթե մարդ այլ տարբերակ չունի այդ գումարը ստանալու»:
Քաղաքապետի հավաստմամբ՝ մարդիկ այսօր անհրաժեշտ գնումները կանեն և մինչ օրվա վերջ ակտիվությունն այլևս չի լինի:
Դիտարկմանը, թե քաղաքացիներն առանց դիմակների և ձեռնոցների են եղել, քաղաքապետն ասաց. «Իսկ ո՞վ ասաց, որ հատուկ հրահանգ կա՝ փողոցում դիմակ կրելու, դա պարտադրված չէ: Իսկ ինչ վերաբերում է ձեռնոցներին՝ կարող եմ ասել, որ բանկոմատներն ախտահանվում են: Բացի այդ, կարծում եմ՝ տեղական իշխանությունները, պատկան մարմինները, սպասարկող կազմակերպությունները պետք է էլ ավելի ուշադիր լինեն, քանի որ շատ քաղաքացիների մոտ բացակայում է սոցիալական պատասխանատվությունը: Մյուս կողմից՝ լուսանկարելու իմաստն էլ չեմ հասկանում, դրա փոխարեն կարելի էր մարդկանց զգուշացնել, ուղղորդել»: