Բագրատունյաց պողոտայում շտապօգնության մեքենան բախվել է մարդատար ավտոմեքենային. կան վիրավորներ
Արտակարգ ՊատահարՀՀ արտակարգ իրավիճակների նախարարության Փրկարար ծառայության ճգնաժամային կառավարման ազգային կենտրոնն ապրիլի 12-ին, ժամը 08:51-ին ահազանգ է ստացել, որ Երևանի Բագրատունյաց պողոտայի թիվ 11 շենքի մոտակայքում տեղի է ունեցել ՃՏՊ. շտապօգնության ավտոմեքենան բախվել է էլեկտրական սյանը:
Դեպքի վայր է մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատի մեկ մարտական հաշվարկ:
Ինչպես տեղեկացրին ՀՀ ԱԻՆ տեղեկատվության և հասարակայնության հետ կապերի վարչությունից, պարզվել է, որ բախվել են շտապօգնության ծառայությունը սպասարկող «Toyota Hiace» (Ստեփան Մ., ծնված 1958 թ.) և «Ford Focus» մակնիշների ավտոմեքենաները (Յուրի Մ., ծնված 1962 թ.), այնուհետև «Toyota Hiace» մակնիշի ավտոմեքենան բախվել է էլեկտրական սյանը: «Toyota Hiace» մակնիշի ավտոմեքենայի վարորդը, բժիշկ Սոֆի Բ.-ն (ծնված 1977 թ.), բուժքույր Նորա Գ.-ն (ծնված 1960 թ.), տեղափոխվող վատառողջ քաղաքացի Հրահատ Մ.-ն (ծնված 1971 թ.), հիվանդին ուղեկցող Գևորգ Մ.-ն (ծնված 2003 թ.), և «Ford Focus» մակնիշի ավտոմեքենայի վարորդը հոսպիտալացվել են «Էրեբունի» բժշկական կենտրոն, որտեղ բժիշկները տուժածների առողջական վիճակը գնահատել են բավարար, իսկ Հրահատ Մ.-ն տեղափոխվել է ստացիոնար բուժման:
Փրկարարները տուժածներին մոտեցրել են շտապօգնության ավտոմեքենաներին և հոսանքազրկել ավտոմեքենաները: