Իսպանական «Ֆորմուլա 1-ի» Գրան֊պրին կանցկացվի դատարկ տրիբունաներով
ՍպորտԻսպանական Գրան֊պրիի կազմակերպիչները նշել են, որ պատրաստ են անցկացնել «Ֆորմուլա 1»-ի չեմպիոնական մրցավազքը առանց հանդիսատեսի, հայտնում է Marca-ն՝ վկայակոչելով SoyMotor- ին: Մարտ ամսին Իսպանիայի Գրան֊պրին, որը նախատեսված էր մայիսի 8-10-ը, հետաձգվել էր անորոշ ժամանակով՝ կորոնավիրուսային համաճարակի պատճառով: 2020 թվականի մրցաշրջանում «Ֆորմուլա 1» -ում դեռևս ոչ մի մրցաշար չի անցկացվել: «Մենք «Ֆորմուլա 1»-ի ղեկավարության հետ քննարկեցինք տարբեր տարբերակներ, որոնցից մեկն այն է, որ մրցաշրջանը կսկսվի ամռանը, մյուսը՝ սեպտեմբերին: Մեզ հարցրեցին՝ կարո՞ղ ենք անցկացնել մրցավազքը դատարկ տրիբունաներում, եթե առաջնությունը սկսվի ամռանը: Պատասխանեցինք դրականորեն: Մյուս կողմից սա թույլ կտա մեզ անցկացնել մրցավազքն այս տարի, մյուս կողմից` ավելի մեծ վստահություն ձեռք բերել 2021-ին Գրան֊պրիի բանակցությունների համար», - ասել է «Բարսելոնա-Կատալոնիա» վազքուղու տնօրեն Ջոան Ֆոնսերը:
«Հաշվի առնելով մեր փորձը և այն փաստը, որ մրցարշավը կարող է տեղի ունենալ առանց հանդիսականների՝ մենք կարող էինք պատրաստել ամեն ինչ երկու-երեք շաբաթվա ընթացքում: Բայց այս դեպքում կազմակերպիչը չի ստանա տոմսերի վաճառքից գումար, այնպես որ «Ֆորմուլա 1»-ի հետ գործող պայմանագիրը չի գործի, քանի որ պայմաններն այս անգամ այլ կլինեն», - հավելել է նա: Ֆոնսերը նշել է, որ «Բարսելոնայում» անհնար է հակառակ ուղղությամբ մրցավազք անցկացնել: «Դա անհնար է Բարսելոնա-Կատալոնիա ավտոճանապարհին: Պատճառը պարզ է․ դա անվտանգության խնդիր է: Կան շատ քիչ ուղիներ, որոնք նախատեսված են տարբեր ուղղություններով մրցարշավներ անցկացնելու համար», - ասել է նա: