Հարձակվել են ՀՀ քաղաքացիների վրա, ստիպել՝ լքել Լարսի տարածքը. Վրաստանում ՀՀ դեսպանությունից պարզաբանում են

Վրացի սահմանապահները մի քանի օր է, ինչ Վերին Լարսի անցակետում գտնվող հայերին ստիպում են լքել տարածքը: Ըստ տարածված տեղեկությունների՝ նրանք մի քանի անգամ հարձակվել են սահմանին մնացած ՀՀ քաղաքացիների վրա։ Քաղաքացիների պնդմամբ՝ իրենք բազմիցս փորձել են կապ հաստատել Վրաստանում ՀՀ դեսպանատան հետ, սակայն իրենց զանգերին չեն պատասխանել։ ԼՈՒՐԵՐ.com-ի հետ զրույցում Վրաստանում ՀՀ դեսպանության մամուլի քարտուղար Հարություն Հայրապետյանն ասաց, որ ՀՀ քաղաքացիները թվով 15-ն են եղել և արդեն հեռացել են չեզոք գոտուց. «Վրացական կողմի պնդմամբ՝ նրանք խաթարում էին անցակետի բնականոն գործունեությունը, սկզբում խնդրել են լքել տարածքը, չեն ենթարկվել, ապա հորդորել և վերջնաժամկետ են ներկայացրել մինչև այսօր առավոտյան ժամը 08:00-ն: Սակայն մեր քաղաքացիները ավելի շուտ են լքել տարածքը և այժմ գտնվում են ՌԴ-ում: Դեսպանության դիվանագետը 2 օր առաջ հանդիպել էր նրանց և փոխանցել սնունդ, առաջին անհրաժեշտության պարագաներ, ներկայացրել է Վրաստանում արտակարգ դրության ռեժիմով պայմանավորված սահմանափակումները, որ այլ երկրի քաղաքացիներն իրավունք չունեն մտնել Վրաստանի տարածք: Մենք մեզնից կախված ամեն ինչ արել ենք. բանակցությունների ժամանակ վրացական կողմը պատասխանում էր, որ կան բազմաթիվ այլ երկրների քաղաքացիներ, որոնք ևս ցանկանում են տեղափոխվել և, եթե մեկին թողնեն, մյուսներին էլ պետք է թողնեն»,- ասաց Հայրապետյանը՝ նշելով, որ ՀՀ քաղաքացիները ստիպված են սպասել սահմանի բացմանը: Անդրադառնալով ՀՀ քաղաքացիների բողոքներին, թե Վրաստանում ՀՀ դեսպանությունից չեն պատասխանում իրենց զանգերին, մամուլի քարտուղարը պատասխանեց. «Քաղաքացիները բազմիցս ապատեղեկատվություն են տարածել և դա առաջին դեպքը չէ: Սկզբում ասում էին 30 անձ են, 20 մեքենա, սակայն հետո պարզվեց 15 անձ են, մեքենաները 9-ն են: Երբ մենք խնդրում էինք ստույգ տեղեկություն տրամադրել, նրանք ուռճացնում էին և այս անգամ ևս: Որքան գտնվել են չեզոք գոտում, դեսպանությունը ամենժամյա կապի մեջ է եղել նրանց հետ, որպեսզի բախման չգնան անցակետի սահմանապահների հետ: Մեր վերջին զանգը երեկ գիշերն է եղել, ժամը 02:00-ին, երբ իմացանք, որ մեր քաղաքացիները լքել են չեզոք գոտին և գտնվում են Ռուսաստանի տարածքում»,- նշեց նա: Ինչ վերաբերում է Ռուսաստանում գրանցում չունենալու հետ կապված ՀՀ քաղաքացիների դժգոհություններին, ապա Հայրապետյանը հայտնեց, որ Ռուսաստանում ՀՀ գլխավոր հյուպատոսությունը արդեն հայտարարել է, որ ցանկացած հարցով կարող են դիմել իրենց և օգնություն կստանան: Նշենք, որ ՀՀ քաղաքացիների խոսքով, թեև գնացել են Ռուսաստան, սակայն շարունակելու են գնալ սահման, մինչև թույլ տան անցնել. «Ռուսաստան անցել ենք, բայց գրանցում չունենք, բոմժի կարգավիճակում ենք։ Մեզ հետ երեխաներ կան, կանայք, առողջական խնդիրներով մարդիկ կան, որոնք մնացել են առանց բուժօգնության»,- ասում են ՀՀ քաղաքացիները։

Սոնա Հարությունյան

Այս թեմայով Քաղաքացիները փակել են Հյուսիս-Հարավ մայրուղին Պռոշյանի հատվածում (լուսանկարներ) Քաղաքացիները միկրոավտոբուսներով փակել են Արշակունյաց պողոտան (տեսանյութ) Քաղաքացիները ստուգում են մեքենաները, որպեսզի բացահայտեն ականազերծող սակրավորներին և թույլ չտան մուտք գործել տարածք (տեսանյութ) Նոյեմբերյանի և Երևանի Կենտրոնի Ոստիկանության բաժիններ բերման ենթարկված քաղաքացիներն ազատ են արձակվել ՈՒՂԻՂ․ Բազմաթիվ քաղաքացիներ փակել են Երևան-Սևան մայրուղին Սևանի թերակղզու հատվածում Ինչ իրավիճակ է Լարսի ճանապարհին Ի՞նչն է խնդիրը, որ Վրաստանում դեղորայքը կրկնակի էժան է, իսկ ՀՀ-ում` ոչ (տեսանյութ) Ադրբեջանը Ռուսաստանի կարևոր ռազմավարական գործընկերն է և հուսալի դաշնակիցը. Բաքվում Ռուսաստանի դեսպանություն Ոսկեպարում բազմաթիվ քաղաքացիներ ՀՀ պետական օրհներգն են միասնաբար երգում Շնորհավորում ենք մեր բոլոր գործընկերներին և բարեկամներին․ ՀՀ–ում ԱՄՆ դեսպանություն