Համավարակի հաղթահարման հարցում ձախողումներ ենք ունեցել. Արման Բաբաջանյան
Society
Վարչական իրավախախտումների վերաբերյալ օրենսգրքում լրացում եւ փոփոխություն կատարելու մասին օրենքի նախագիծը քննարկվեց և առաջին ընթերցմամբ ընդունվեց ԱԺ արտահերթ նիստում: Նիստի ընթացքում օրենքի բուն բովանդակության քննարկմանը հաջորդեց պատգամավորների պնդումների մասը՝ դիմակների կարևորության, դրանց կրել-չկրելու մասին: Անկախ պատգամավոր Արման Բաբաջանյանն իր ելույթում նշեց, որ համավարակի հետ կապված իրավիճակն ահագնացող է և տխուր: ԼՈՒՐԵՐ.com-ի թղթակիցը հարց ուղղեց պատգամավորին, թե ինչի հետևանք է համարում Հայաստանում վարակակիրների՝ օր օրի աճող թվերը: Ի պատասխան այս հարցի, Բաբաջանյանը պատասխանեց․
«Գործողությունների համաչափության մասին մենք կկարողանանք խոսել ու արված աշխատանքը գնահատել համավարակի ամբողջական հաղթահարումից հետո միայն։ Իրավիճակը, այո, խիստ մտահոգիչ է, և ակնհայտ է, որ մենք ինչ-որ հարցում, ինչ-որ փուլում ձախողումներ ենք ունեցել։ Խնդիրն, անշուշտ, առաջին հերթին վերաբերում է իշխանությունների քայլերին, որոնք միշտ չէ, որ բավարար խստություն են ունեցել։ Սակայն եկեք անկեղծ լինենք և խոստովանենք, որ այսօրվա իրավիճակն ունենք նաև մեր քաղաքացիների ոչ համարժեք վերաբերմունքի ու վարքագծի պատճառով։ Մեր քաղաքացիների զգալի մասը լուրջ չի ընդունում համավարակը և տեղեկատվական մանիպուլիացիաների ազդեցության տակ ընդհանրապես չի հավատում, որ նման վարակ գոյություն ունի»,-նշում է պատգամավորն ու եզրակացնում՝ դրանք համապատասխան ոչ համարժեք վարքագիծ են առաջացնում քաղաքացիների շրջանում, ինչի արդյունքում ունենք այսօրվա մտահոգիչ իրավիճակը։
Բաբաջանյանն արձանագրում է, որ մենք, ցավոք, այսօր կարող ենք համեմատվել ոչ թե վարակը հաղթահարած ու նվազագույն կորուստներով իրավիճակից դուրս եկած երկրների, այլ համավարակի բռնկում ու մեծ ծավալներ արձանագրածների՝ Իտալիայի, Ֆրանսիայի հետ։
«Այս համեմատություններում մենք պետք է գտնենք այն հարցերի պատասխանները, թե որ գործոններն են պատճառ հանդիսացել, որ մենք չենք կարողացել իրավիճակը կառավարելի դարձնել հենց մեր հարևան Վրաստանի օրինակով»։
Մեջբերելով Բաբաջանյանի բերած օրինակը, որով նա պնդում էր, թե բաց և փակ տարածքներում դիմակ կրելը տասն անգամ պակասեցնում է վարակի տարածումը, հարց ուղղեցինք նրան՝ հիշեցնելով, որ նախարար Արսեն Թորոսյանը անընդհատ պնդում էր, որ դիմակներ կրելն ամենևին կարևոր չէ վարակի տարածման հարցում: Հարցին՝ Թորոսյանն ունի իր անմիջական մեղավորությունը, որ մարդիկ անլուրջ են վերաբերում կանխարգելող միջոցառումներին ու պաշտպանական միջոցներին, պատգամավորը պատասխանեց. «Կարծում եմ՝ հիմա մեղավորներ ու պատասխանատուներ փնտրել-գտնելու ամենալավ ժամանակը չէ, քանի որ համավարակը դեռ հաղթահարված չէ, և մենք, ըստ էության, գտնվում ենք կորոնավիրուսի հետ պատերազմի իրավիճակում, որը, ցավոք, կարող է ավելի աղետալի դառնալ։ Վստահ եմ, որ համավարակի հաղթահարումից հետո նաև ձեր նշած հարցերը կհայտնվեն հանրային–քաղաքական, չեմ բացառում՝ նաև իշխանության օրակարգում և, եթե կլինեն վատ աշխատած պաշտոնյաներ, նրանք կենթարկվեն պատասխանատվության»։
Բաբաջանյանն անդրադառնալով իր՝ դիմակներ կրելու պայմանի արդյունավետությանը, կրկին մեջբերեց գիտական հանրության պնդումները. «Երկրների փորձը ցույց է տալիս, որ դիմակների կրումը զգալիորեն կանխարգելում է վարակի տարածումը։ Օրինակ, Ավստրիայի իշխանությունները հայտարարել են, որ իրենց հաջողվել է հաղթահարել համավարակը՝ 90 տոկոսով դիմակների պարտադիր կրման շնորհիվ։ Նույն կերպ պետք է առաջնորդվենք նաև մենք, ու մարդիկ դիմակներ պետք է կրեն ոչ թե այն պատճառով, որ դրանք չկրելու համար կարող են տուգանվել, այլ որովհետև դա էականորեն նվազեցնում է վարակվելու և վարակելու հավանականությունը»։
Most Popular 
Cyberattack forces Georgia county to sever connection to state voter registration system
