Ես կոչ եմ անում գործող իշխանությանը ազատ արձակել Արթուրին եւ վերջ տալ մարդկանց իրենց հայացքների համար հետապնդմանը. Չալաբյան

«Ազգային օրակարգ» կուսակցության համահիմնադրի Ավետիք Չալաբյանը  ֆեյսբուքյան իր էջում հրապարակել է «Կամք» հասարակական շարժման անդամ Արթուր Ալեքսանյանի լուսանկարը, որն օրերս կալանավորվել էր ԱԺ «Իմ քայլը» խմբակցության պատգամավոր Նիկոլայ Բաղդասարյանի հետ վիճաբանելուց հետո:

Ավետիք Չալաբյանի գրառումը ներկայացնում ենք ստորեւ.

«Այս նկարում «Կամք» հասարակական շարժման անդամ Արթուր Ալեքսանյանն է:

Անցած շաբաթ դատարանը որոշեց երկու ամսով կալանավորել նրան, քանի որ նա վիճաբանել էր ԱԺ «Իմ քայլը» խմբակցության պատգամավոր Նիկոլայ Բաղդասարյանի հետ, նրանից հետո, երբ այդ խմբակցությունը, առանց որեւէ հանրային քննարկման, առանց ընդդիմության կարծիքը հաշվի առնելու, օգտվելով արտակարգ դրության պայմաններից, վավերացրել էր վիճահարույց Լանզարոտեի կոնվենցիան։

Արթուրը ոչ միայն կալանավորվել է, այլեւ նրան վերագրվել է Քրեական օրենսգրքի անհեթեթ հոդված՝ «Իշխանության ներկայացուցիչի նկատմամբ բռնություն գործադրել», թեեւ Արթուրը չի ընդունում բռնության փաստը, իսկ պատգամավորն էլ իշխանության ներկայացուցիչ չի, այլ ժողովրդի ներկայացուցիչ (316 հոդվածը նաեւ հստակ սահմանում է, որ այն վերաբերվում է իշխանության մարմինների կարգադրիչ լիազորությամբ աշխտակիցներին)։ Արթուրը ընդամենը կոշտ ոճով իր անհամաձայնությունն է հայտնել պատգամավորին, դա առավելագույնս կարելի է դիտարկել որպես վարչական իրավախախտում, սակայն դրա համար մարդը չպետք է հայտնվի կալանավայրում։

Այս իշխանությունը սիրում է պատեհ-անպատեհ իրեն նույնացնել ժողովրդի հետ, կոչել իրեն "ժողովրդի իշխանություն", իրեն հասցեագրված քննադատությունը ուղղորդել ժողովրդի վրա։ Արթուրը այդ ժողովրդի իրական ներկայացուցիչ է, խիստ համեստ կենսակերպով ապրող, իր հայացքներում անսահման սկզբունքային (նույնիսկ տեղ-տեղ ծայրահեղական), դրանց համար նվիրյալ պայքարող։ Այն ընթացքում, երբ ես ճանաչել եմ իրեն, Արթուրը անզիջում պայքարել է Ստամբուլյան կոնվենցիայի վավերացման դեմ, եւ հետեւողականորեն պաշտպանել է մեր ավանդական արժեհամակարգը նրա դեմ ուղղված (եւ հաճախ այս իշխանության հովհանավորությունը վայելող) տարբեր դիվերսիաներից։ Այսօր Արթուրը բանտում է միայն այդ պատճառով, եւ դա ծաղր է հենց մեր ավանդապաշտ ժողովրդի, մեր ավանդական արժեքների, ինչպես նաեւ ժողովրդավարության եւ իրավունքի նկատմամբ։

Ես կոչ եմ անում գործող իշխանությանը, եւ նրան ենթակա իրավապահներին՝ ազատ արձակել Արթուրին, եւ վերջ տալ մարդկանց իրենց հայացքների համար հետապնդմանը։ Եթե նույն Նիկոլայ Բաղդասարանը համոզված է իր հայացքների ճշմարտացիության մեջ, թող եթերում բանավիճի Արթուր Ալեքսանյանի հետ, եւ դրանում համոզի նրան եւ նաեւ ողջ հասարակությանը։ Այլապես, ոստիկանական ճնշումը վախկոտների վերջին հանգրվանն է, իսկ Արթուր Ալեքսանյանի հետեւից նոր Արթուրներ կգան, եւ ի վերջո ոտնատակ կանեն ձեզ էլ, ձեր իշխանությունն էլ»:

Այս թեմայով Ավետիք Իշխանյանը դիմել է ընդդիմությանը․ «Եվ ի՞նչ, գո՞հ եք, հանդուրժելու՞ ենք, թե՞․․․» Ավետիք Չալաբյանը 1 մլն դրամ է փոխանցել Սամվել Վարդանյանի գրավի համար Այս իշխանությունը մարդկանց օգտագործում է և փչացնում, պետք չէ հոգին ծախել սատանային. Չալաբյան ՈՒՂԻՂ. Ավետիք Չալաբյանի գործով դատական նիստը շարունակվում է Փաշինյանը հաստատեց՝ պատրաստվում է հանձնել Տավուշի սահմանագծի կարևոր մի հատված. Ավետիք Չալաբյան Արցախը հայաթափված և դատարկ սպասում է իր տերերին, թեև վերադարձի հեռանկարները առնվազն մշուշոտ են. Չալաբյան Նոր պատերազմի ուրվականը․ Ավետիք Չալաբյան ՔՊ-ից որոշակի նշաններ ստանում ենք, կան պատգամավորներ, ովքեր գիտակցում են եղածը. Չալաբյան Մեր ազգը իսկապես գտնվում է խորը ճգնաժամի մեջ, այդ իմաստով համաձայն եմ Սրբազան հոր հետ․ Չալաբյան Եթե Փաշինյանի իշխանությունը Րաֆֆու, Նժդեհի գրքերը խարույկների վրա այրի, չեմ զարմանա. Չալաբյան