«Մենք «բառադի» ազգ չենք, հարգելի Նարեկ»

Լրագրող Նարեկ Կիրակոսյանը Ֆեյսբուքի իր էջում անդրադարձել է թավջութակահար Նարեկ Հախնազարյանի ֆեյսբուքյան տեսաուղերձին:

Կիրակոսյանի գրառումն ամբողջությամբ՝ ստորև.

«ՀՀ վաստակավոր արտիստ, թավջութակահար Նարեկ Հախնազարյանը ֆեյսբուքում տեսանյութ (մեկնաբանություններում) է հրապարակել, որտեղ հայ ազգի զգալի մասին ամոթանք է տալիս եւ անվանում «բառադի», «դավաճան»՝ նրանց մեղադրելով համավարակի տարածման տեմպերն արագացնելու մեջ: Մենք «բառադի» ազգ չենք, հարգելի Նարեկ, իսկ թե ինչու՝ կներկայացնեմ ստորեւ:

Նախ Ձեր մի քանի պնդումների մասին: Դուք ասում եք, որ վարչապետը, պարետը եւ առողջապահության նախարարն արեցին ամեն ինչ, որ դադարեցնեն կորոնավիրուսի աճը, իսկ քաղաքացիների մեծ մասը «դավաճանի» նման ոչ մի բան չարեցին: Շատ լավ, չեմ հերքում, որ մեր ղեկավարները ձեռքերը ծալած չեն նստել, փորձել են համավարակի տարածումը կանխել: Իսկ ի՞նչ անի այն «դավաճան», «բառադի» քաղաքացին, երբ առողջապահության նախարարը՝ երկրի թիվ մեկ առողջապահության պատասխանատուն հայտարարում է. «Քանի որ կորոնավիրուսը շատ վտանգավոր վիրուս չէ, շատ հատուկ միջոցառումների կարիք չկա», իսկ այս հայտարարությունից ուղիղ երեք օր անց՝ մարտի մեկին գրանցվում է ՀՀ-ում վիրուսի առաջին դեպքը, վարակակրից զատ մեկուսանում է եւս երեսուն հոգի:
Աղբյուր՝ https://www.tert.am/am/news/2020/02/27/torosyan/3221880

Մարտի 19-ին, երբ երկրում արդեն կար 136 վարակակիր Ձեր նշած «ամեն ինչ անող» առողջապահության թիվ մեկ պատասխանատուն հայտարարում է. «Բժշկական դիմակներն իրականում չեն պաշտպանում վիրուսից, քանի որ վիրուսը շատ ավելի բարակ է, քան դիմակի վրա առկա անցքերը»:
Աղբյուր՝ https://hetq.am/hy/article/114716

Եւ միայն ապրիլի 10-ին է, որ նախարարը խորհուրդ է տալիս դիմակ կրել, երբ երկրում արդեն կար 937 վարակված եւ 11 մահացած քաղաքացիներ:
Աղբյուրներ՝https://www.azatutyun.am/a/30545948.html, https://www.tert.am/am/news/2020/04/10/coronavirus/3260015

Այս բոլորին գումարում ենք կառավարության ամենառեյտինգային պաշտոնյայի՝ վարչապետի հայտարարությունը, որին շատերն են հավատում: Նա մարտի 12-ին ասում էր. «Կորոնավիրուսը գրիպի նման վիրուս է, ոչ մեկ չի ասում՝ այդ վիրուսը հաճելի է, բայց ավելորդ խուճապ պետք չի տարածել»:
Աղբյուր. https://factor.am/229093.html

Միայն մայիսի կեսերից դիմակները դարձավ պարտադիր՝ բոլոր վայրերում, երբ ունենք հազարավոր վարակվածներ եւ տասնյակ մահեր Բարձրաստիճան պաշտոնյաները իրենց վերոնշյալ հայտարարությունները սրբագրեցին ու մի քանի անգամ ավելի էլ ասացին, որ սա վտանգավոր վիրուս է: Բայց մինչև այս, ըստ նրանց՝ կորոնավիրուսը վտանգավոր չէր եւ քաղաքացիներն էլ լսելով հեղափոխական իշխանության ներկայացուցիչների այս խոսքերը լուրջ չվերաբերվեցին դրան, եւ քանի՞ տասնյակ մարդ վարակվեց այդ օրերին: Հարգելիս, բառադի քաղաքացին չէր, որ Սյունիքում քարոզարշավ էր անում՝ վարակակիր մեկ այլ հայրենակցի մասնակցությամբ, այլ վարչապետն էր անում, որը հետագայում մի քանի անգամ թեստ հանձնեց:

Այստեղ էլի՞ «բառադի» եւ «դավաճան» քաղաքացի՞ն է մեղավոր: Քաղաքացին, որ նախ լսում է, որ դիմակը պետք չի, կորոնան գրիպ է, իսկ հետո՝ մեկ ամիս անց, ղեկավարությունը մտափոխվում է եւ այլ բան ասում: Մտափոխման մեկ ամիս ժամանակահատվածում գրանցված դեպքերի համար էլ է քաղաքացին մեղավո՞ր:
Ասում եք՝ ամեն ինչ արել են: Իսկ կարող եք ասել, թե ինչու՞ պարետատունն այսօրվա խիստ կանոնները՝ դիմակների կրման մասով, հենց մարտի մեկից չսահմանեց: «Բառադի» հայե՞րն են մեղավոր:

Տեսանյութում Դուք ասում եք, որ երբ կառավարության արածը համեմատում եք եվրոպական երկրների՝ այն էլ զարգացածների հետ, տեսնում եք, որ հետ չենք մնացել: Հարգելի Նարեկ, իսկ Դուք ո՞ր երկրների հետ եք համեմատել մեր կառավարության արածը: Այո, մերոնք հակաճգնաժամային 19 միջոցառում են իրականացնում, բայց Դուք դրանց արդյունավետությունը ստուգե՞լ եք: Դուք ասում եք Եվրոպայից հետ չենք մնացել: Ես Եվրոպա չեմ հասնի, հարեւան Վրաստանը դիտարկենք, որտեղ մի քանի ամսով կոմունալներն է կառավարությունը վճարում եւ նույնքան ամսով էլ վարկային պարտավորություններն է կասեցնում: Իսկ Հայաստանում ծրագրերով 26 կամ 68 հազար են տալիս, ասում էին՝ մոտ երկու ամիս մնա տանը: Բա եթե այս պայմաններում քաղաքացին տանից դուրս չգար, գործի չգնար, ապա ինչպե՞ս էր հաց առնելու, ինչպե՞ս էր կոմունալի էն մնացած կեսը վճարելու եւ այլ ծախսեր հոգալու: Հավատացեք երկրում կան մարդիկ, որ մեկ օր չաշխատելով՝ անգամ հացի խնդիր կունենան:

Հարգելի Նարեկ, Դուք ասում եք՝ դեղատներում դիմակները եւ ախտահանիչները լիքն են, բայց նշում ենք, որ Դուք գները չգիտեք, մոտավոր գներ եք նշում: Հետո վստահեցնում եք, որ թանկ չեն դրանք, առաջարկում եք 1 կամ 10 հատ դիմակ գնել: Դուք գիտե՞ք, որ դիմակները վաճառվում են 200-1500 դրամով: Եթե մի քիչ որակով դիմակ եք ուզում, ապա պետք է վճարեք գոնե 350 դրամ: Առողջապահության կազմակերպիչներն ասում են՝ չորս ժամը մեկ փոխեք դիմակները: Միայն ութ ժամ աշխատող քաղաքացուն ահնրաժեշտ է երկու դիմակ, որը մեկ օրվա համար կազմում է 700 դրամ, սա մեկ ամսվա համար անում է 21 հազար դրամ: Դուք լո՞ւրջ՝ կարծում եք, որ այս երկրում նվազագույն 68 հազար դրամ աշխատավարձ ստացողը կարող է ամեն ամիս 21 հազար դիմակի փող տալ: Իսկ հետաքրքրվե՞լ եք, գիտե՞ք՝ Ձեր նշած «ամեն ինչ արած» կառավարությունը քանի անապահովի է դիմակով ապահովել, իսկ նրանք հրաժարվել են կրել եւ դարձել են բառադի:

Ձեր հաջորդ պնդումն այն մասին է, որ այս երկրի բնակչության փոքրամասնությունն է, որ գիտակից է եւ դիմակ է կրել, կրում: Խնդրում եմ ներկայացնել Ձեր հետազոտությունները, ի՞նչ աղբյուրներից եք օգտվել, որտե՞ղ եք ուսումասիրությունները կատարել, քանի՞ քաղաքացի է ներառված եղել այդ հետազոտության մեջ: Ի՞նչ պարբերականությամբ է կատարվել հետազոտությունը, որ հանգել եք այն արդյունքին, թե մեր՝ հայերիս մեծ մասը «բառադի» են եւ դիմակ կրելու գիտակցություն չունեն: Դուք երեք միլիոնից գոնե պետք է 2,5 մլն.-ի շրջանում հետազոտություն կատարած լինեիք, երկու մլն-ի մոտ դիմակ չգտնեիք եւ նոր միայն որակում տայիք, որ մեծամասնությունը անգիտակից է:

Տեսանյութում պնդում եք՝ չի եղել մի օր, որ երկրում դիմակի եւ ալկոգելի դեֆիցիտ լինի: Դուք այստեղ սխալվում եք, քանի որ դիմակների դեֆիցիտի մասին հենց առողջապահության նախարարն է հայտարարել: Անգամ եղել է օր, որ ընդամնեը հազար հատ դիմակ ենք ունեցել: Ու Դուք դեֆիցիտի պայմաններում ապրող քաղաքացո՞ւն եք անվանում անգիտակից եւ «բառադի»: Դուք մարտ ամսվա սկզբին խոշոր դեղատների ցանցերում դիմակ գտե՞լ եք:
Աղբյուրը՝ https://news.am/arm/news/578942.html

Ես ամենեւին չեմ ասում, որ քաղաքացիները անթերի են եւ միակ մեղավորը իշխանություներն են: Այո՛, կան քաղաքացիներ, որ դիտավորյալ կամ չհասկանալով խախտում են արտակարգ դրության կանոնները: Բոլորիս շրջապատում էլ կան մարդիկ, որ ասում են՝ վիրուսը չկա, չիպավորման կամ դիմակի բիզնեսի համար է: Բայց մեր քայլը չպետք է լինի նրանց խեղդելու առաջարկ անելը (ինչպես Դուք եք առաջարկում՝ դիմակը դնել անգամ խեղդվելու եւ մեռնելու գնով) եւ իշխանություններին սրբադասելը, այլ պետք է մեզ հարց տանք՝ քանի՞ դիմակ չունեցողի ենք դիմակ տվել, քանի անգիտակից քաղաքացու ենք փորձել գիտակից դարձնել:

Հ.Գ. Այս պայմաններում քաղաքացին բառադի չէ: Քաղաքացին հոգեբանական աջակցության կարիք ունի, երբ նույն օրը՝ ապրիլի 10-ին, վարչապետից լսում է, որ իրավիճակը կառավարելի է, իսկ առողջապահության նախարարից լսում է, որ կառավարելի չէ:

Աղբյուր.

Հ.Գ.-2 Հույս ունեմ մի օր կապրենք այնպիսի երկրում, որ բոլոր քաղաքացիները Ձեզ նման կցանկական բոլոր ղեկավարների հետ լուսանկարվել»:

Այս թեմայով Այլևս լռելու իրավունք չունեմ. Նարեկ Հախնազարյան Բիզնես չունեմ, եկամտի աղբյուր չունեմ կորոնավիրուսի օրերին. Նարեկ Հախնազարյան (տեսանյութ) Նարեկ Հախնազարյան. Լեզուն թավջութակից ստորադասողը. «Մշակութային Հրապարակ»