Արտաշատի համայնքապետը փոխեց որոշումը․ կվճարի մանկապարտեզի աշխատակիցներին
ՀասարակությունՔիչ առաջ ԼՈւՐԵՐ.com-ը մանկապարտեզի աշխատակիցների ահազանգի հիման վրա հրապարակում էր արել, որտեղ նշվում է, որ Արտաշատի քաղաքապետը մանկապարտեզների աշխատակիցների մայիս ամսվա աշխատավարձը լրիվ չի վճարում, իսկ հուլիս ամսին պարտադիր արձակուրդ է ուղարկում։ Մեր հրապարակումից հետո Արտաշատի համայնքապետ Կարեն Բենիամինյանը կարծես թե փոխել է որոշումը և ի պատասխան մեր հրապարակման՝ պարզաբանում է․ «Արտաշատի համայնքապետարանի ենթակայության նախադպրոցական, արտադպրոցական, մշակութային և սպորտային կազմակերպությունները սույն թվականի մարտ և ապրիլ ամիսներին հանրապետությունում նոր կորոնավիրուսային իրավիճակով պայմանավորված գտնվել են հարկադիր պարապուրդում, սակայն աշխատակիցները վճարվել են աշխատավարձի 100 %-ի չափով, ինչը համայնքապետի ցուցաբերած բարի նախաձեռնության արդյունքն է: Հաշվի առնելով նոր կորոնավիրուսի հետևանքով առաջացած համաճարակի առկայությունը և վարակի առավել տարածման վտանգավորության աստիճանը և ղեկավարվելով Հայաստանի Հանրապետության Աշխատանքային օրենսգրքի 186-րդ հոդվածով՝ Արտաշատի համայնքապետի կարգադրությամբ 2020 թվականի հունիսի 1-ից անորոշ ժամանակով երկարաձգվել է Արտաշատի համայնքապետարանի ենթակայության նախադպրոցական, արտադպրոցական, մշակութային և սպորտային կազմակերպությունների աշխատանքի դադարեցումը։ Վերոնշված ժամանակահատվածի համար կազմակերպությունների աշխատակիցները կվճարվեն հարկադիր պարապուրդի դիմաց, ինչը որևէ օրենք չի խախտում»,- նշվում է պարզաբանման մեջ: Ինչ վերաբերվում է որևէ մեկին ստիպողաբար արձակուրդ պարտադրելուն, ապա համայնքապետարանից ասում են, թե լուրերը չեն համապատասխանում իրականությանը: Ավելի վաղ, հայտնել էինք, որ մանկապարտեզի աշխատակիցները ահազանգել են մեզ և ներկայացրել, թե ինչ խնդրի առաջ են կանգնել․ «Մենք ստանում ենք ընդամենը 40 000 աշխատավարձ, ու հիմա քաղաքապետը որոշել է այս ամիս դրա 66%-ը վճարել, որը կազմում է մոտավորապես 25 000 դրամ։ Հաշվի առնելով արտակարգ իրավիճակը՝ պարտավոր են լրիվ վճարել, բայց մի բան էլ մեր հացն են կտրում։ Աշխատակիցներ ունենք, որ մի քանի երեխա ունեն, խղճուկ գումարով ինչպե՞ս պահենք մեր երեխաներին», ասել էին նրանք։