ՍԴ-ում արդեն 6 դատավոր կա. այսօրվանից կմասնակցեմ ՍԴ նիստերին. Վահե Գրիգորյան
Ես նախ շնորհավորում եմ սահմանադրական փոփոխություններն այսօր ուժի մեջ մտնելու կապակցությամբ: Այս մասին այսօր՝ հունիսի 26-ին, ՍԴժի դիմաց լրագրողների հետ զրույցում նշեց ՍԴ դատավոր Վահե Գրիգորյանը:
«Ես համարում եմ, որ սա ՍԴ-ի ճգնաժամի լուծում է եւ միանշանակորեն ողջունում եմ ԱԺ այս քայլը: Սա համարձակ ու պատմական քայլ է: Պատմականությունն այն է, որ առաջին անգամ ԱԺ-ն հանդես գալով սահմանադրի անունից Սահմանադրության մեջ փոփոխություն կատարելով այդ փոփոխությունը նվիրել է հենց ՍԴ-ին՝ դրանով ընդգծելով ՍԴ կարեւորությունը պետական մարմինների համակարգում եւ այն դիտելով որպես առաջնային ճգնաժամ, որը ենթակա էր լուծման»,-ասաց նա:
Գրիգորյանը նշեց, որ ինքն ամեն օր է աշխատանքի ներկայանում, այսօրվանից սկսած արդեն մասնակցելու է նիստերին. «Այս պահից դատարանում արդեն կա 6 դատավոր: Դա բավարար քվորում է ՍԴ բոլոր լիազորություններն իրականացնելու համար»:
Հարցին՝ գտնում է արդյո՞ք, որ ինքը բարեխղճորեն կատարել է իր լիազորությունները, Գրիգորյանը պատասխանեց, որ անցած մեկ տարվա ընթացքում չի կարողացել կատարել իր աշխատանքային պարտականությունները, քանի որ «ՍԴ կազմի սահմանադրականությունը լրջորեն հարցականի տակ էր». «Ես այս կազմը սահմանադրական չեմ համարել և համարել եմ, որ Հայաստանի ՍԴ-ն ունի դեմոկրատական լեգիտիմության էական բաց և այդ կազմով չի կարող հանդիսանալ ու արժանի լինել ՀՀ ՍԴ լինելուն»,-ասաց Գրիգորյանը: