Նոյեմբերյանցիներն ահազանգում են՝ 5 օր է խմելու ջուր չունեն. «Վեոլիա Ջրից» պարզաբանում են

Նոյեմբերյանցիներն ահազանգում են՝ 5 օր է խմելու ջուր չունեն և այս պահին իրավաբանների հետ քննարկում են «Վեոլիա ջուր» ընկերության դեմ դատական հայց ներկայացնելու խնդիրը․ «Ո՞ւր է նայում Նոյեմբերյանի համայնքապետը, եթե կա, իհարկե։ Ավելին, մենք նկատում ենք, որ ջուրը Նոյեմբերյանում այլևս ժողովրդինը չէ, այլ ծառայեցվում է ինչ-որ «թայֆայական» շահերի․ մեկը ջուր ունի, մյուսը՝ ոչ։ «Ծանոթները» ջուր ունեն, իսկ մեկնաբանությունները, թե ջուր չկա ամբարում, անիմաստ են։ Հզորացող Նոյեմբերյանը սա չէ»,- բողոքում են նրանք։

Խնդրի վերաբերյալ պարզաբանում ստանալու համար ԼՈՒՐԵՐ․com-ը զրուցեց «Վեոլիա Ջուր» ՓԲԸ-ի հանրային կապերի ծառայության պետ Մուրադ Սարգսյանի հետ։ Վերջինս նշեց, որ զուտ տեխնիկական խնդիր էր եղել, որի լուծումն ընթացքի մեջ է, 2-3 օրվա ընթացքում Նոյեմբերյանի մի քանի համայնք կստանա բնականոն ջրամատակարարում․ «Մեր ամբողջ համակարգում երբեմն տեխնիկական խնդիրներ են առաջանում և քանի որ համակարգը ավտոմատ ռեժիմով է գործում, մենք իմանում ենք այն ժամանակ, երբ տեսնում ենք ջրի քանակի կարիք կա։ Հայտնաբերվել են վթարներ, որի հետևանքով ջուրը կորչում է։ Ժամանակ էր անհրաժեշտ սարքավորումները փոխելու համար, և հիմա արդեն ջուրը նորմալ գալիս է։ Այս պահին նաև ջրամբարներն են լցվում և 2-3 օրվա ընթացքում բոլոր բնակավայրերի ջրամատակարարումը կվերականգնվի և բոլորն ապահովված կլինեն ջրով»,- նշեց նա։ Ինչ վերաբերում է բնակիչների կողմից իրենց դեմ դատական հայց ներկայացնելուն, ապա Սարգսյանն ասաց՝ այդ մասին տեղեկություն չունի․ «Եթե մարդիկ գտնում են, որ հարցի լուծումը դա է՝ ինչ արած, իրենց իրավունքն է, բայց ես դրա կարիքը չեմ տեսնում»։

Մեզ հետ զրույցում Նոյեմբերյան համայնքի ղեկավարի տեղակալ Խաչիկ Գիշյանին զարմացրեց բնակիչների բողոքը, թե մի մասը ջուր ունի, մյուս մասը՝ ոչ․ «Ինչպե՞ս կարող է մի թաղամասին ջուր տալ, մյուսին՝ ոչ։ Եթե դատական հայց են ներկայացրել՝ շատ լավ են արել, որովհետև ջրի գումարները տալիս են «Վեոլիա ջուր» ընկերությանը, Նոյեմբերյանի համայնքապետարանին ոչ ոք ջրի գումար չի վճարում։ Չնայած դրան մենք պատրաստ ենք ամեն ինչով օգնել, որ քաղաքի ջրամատակարարումը չդադարի»,- ասաց նա՝ նշելով, որ խնդիրը մի քանի օր է տևել, բայց ջրամատակարարումն արդեն վերականգնված է։ 

Սոնա Հարությունյան

Այս թեմայով Երևանում խմելու ջրի մայր խողովակի վնասման պատճառով ջուրը ողողել է բնակելի տներ, տեղի է ունեցել փլուզում «Ժողովուրդ». Սեփական կարիքները պետական բյուջեի հաշվին․ 3 մլն 850 հազար դրամի ջուր Ազգային Ժողովի համար Ի՞նչ պարտավորություն ունեն և ո՞ւմ ջրաղացին են ջուր լցնում Հայաստանի իշխանությունները. «Փաստ» Մալաթիա-Սեբաստիա վարչական շրջանի որոշ հասցեներում 24 ժամ ջուր չի լինի «Վեոլիա Ջուրը» վթարային ջրանջատումների մասին է հայտնում Նորակերտ գյուղում խմելու ջրատարի արտաքին ցանց է կառուցվել Խմելու ջրի կորուստը կազմում է 63 տոկոս․ ՏԿԵ նախարարը նվազման միտում է տեսնում Խմելու ջրի կորուստը կազմում է 63%, որը թեև սարսափելի է, բայց 2022թ-ի համեմատ նվազել է 15%-ով Կհստակեցվեն «Վեոլիա ջրի» և մատակարարների միջև հարաբերությունները. նախագիծ. «Փաստ» Նախարարի մոտ քննարկվել են խմելու ջրի որակի, ծխախոտային արտադրատեսակների օգտագործման նվազեցմանն առնչվող հարցեր