Պատգամավորը կգնա՞ խողովակը վերանորոգելու, թե՞ ստատուս գրելը բավարար է

ԱԺ «Լուսավոր Հայաստան» խմբակցության պատգամավոր Սրբուհի Գրիգորյանը տեղեկացրել էր, որ Սյունիքի մարզի Հացավան բնակավայրում  արդեն 3 օր է՝ խմելու ջուր չկա։

ԼՈՒՐԵՐ.com-ը Հացավան վարչական շրջանի ղեկավար Անահիտ Մարգարյանից հետաքրքրվեց՝ ի՞նչն է պատճառը, որ ջուր չկա, արդյոք խնդրի լուծումն այդքան դժվար է:

Նա պատմեց, որ ջուր չի ունեցել ընդամենը 4 տուն, բայց այժմ` հարցը կարգավորվել է. «Ջրագիծը բարդ է, ջրի մակարդակը ցածր է: Վթար է եղել, խողովակները պայթել են, բայց վերանորոգել ենք»:

Ղեկավարը չի հասկանում, թե ինչու է պատգամավորը նման հայտարարություններ հաճախակի անում. «Մայիսի 1-ին էլի ջուր չունեինք, պատգամավորը տեղեկացրել էր, մենք էլ խնդիրը ներկայացրինք իրեն, բայց ոչինչ չասաց: Թող գա, տեղում տեսնենք՝ որն է խնդիրը: Խողովակը պայթում է, ի՞նչ կարող ենք անել»,-ընդգծեց Մարգարյանը:

Ղեկավարը նշում է, որ, ի տարբերություն նախորդ  դեպքի՝ այս անգամ մասնագետներ հրավիրելու կարիք չի եղել:

«Ջուրը ստանում ենք  40 կմ հեռավորությունից, լցվում է լողավազան, մարդիկ էլ շատ են օգտագործում, դրա պատճառով մակարդակը իջնում է, ու, արդյունքում, մի քանի բնակիչ ջրի խնդիր է ունենում»,-մեկնաբանեց Մարգարյանը:

Նրա խոսքով՝ եթե գյուղում ջուր չեն ունենում, մարդիկ օգտվում են տարբեր աղբյուրներից. կողքի համայնքից ու հարևաններից են բերում, գետերից են վերցնում:

Ղեկավարը նշում է, որ ճիշտ է՝ հիմա ջուր լցնում են լողավազան, բայց չգիտեն՝ ամբողջությամբ կլցվի՞, թե՞ ոչ, դե իսկ  ամռանն էլ ջուր շատ են օգտագործում:

Նշենք, որ շրջանում ջուրը մատակարարում է «Վեոլիա ջուր» փակ բաժնետիրական ընկերությունը, որը տեղյակ է խնդրին և փորձում է ամբողջությամբ կարգավորել այն: